ابشع اختراع رأسمالي هوا البوركيني، كاتلبسيه كاتولي مكلكمة، كاتباني فحال شي حيوان منوي، لباس ديكتاتوري، كايزيد يكرس النظرة الدونية لجسد المرا على اساس أنه عورة خاصو يتغطى في حين الراجل لا، من حقو يتبحر و يحس بالما كايقيس الجلدة ديالو و يتشمش مع راساتو ! الحگرة و صافي

سهام البارودي – كود//

غا باش تعرفو بلي الشركات الراسمالية الكبيرة راه ماكاتحاربش الاسلام و المسلمين فحالي كايروجو بزاف ديال اللحايا ! شوف غا البوركيني مثلا واش اختارعو شي مسلم ؟ ختارعوا شي داعية شي شيخ شي ابو فلان الزعطلاني ؟ طبعا لا ! اخترعته الشركات الرأسمالية الكبيرة فحال نايك و اديداس و طومي و هلم جرّا، حيت شافو بلي فيه الفلوس و كاينة سوق كبيرة ديال العيالات ممكن يشريوه و يدخلو على ظهرهم الگرمومة !

داكشي علاش كايجيني البوركيني ابشع اختراع رأسمالي، كايزيد يكرس النظرة الدونية للمرأة، و ينشر ديك الفكرة ديال انه الجسد ديال المرا عورة خاصو يتغطّى و المرا و الراجل ماشي سواسية حتى فالاستمتاع بالبحر. الراجل من حقو يستمتع بالما كايقيس ليه الجلدة ديالو و يتبرونزا مع راساتو و المرا لا، المرا خاصها تبقا مكلكمة فحال شي مومياء و زامتة راسها وسط ثلاتة ميترو ديال الليكرا.

و القوادة الاكبر هي انه ولينا كانحضرو لعصر ديكتاتورية البوركيني بلا مانعيقو، من بعد ماكانو المغربيات كايعومو فالبحر بالمايو دو بان سوا دوبياس سوا بياسة وحدة، و العروبيات كايعومو بالبيجامات، دابا وليتي كاتشوف واحد الانتشار خطير للبوركيني لي مسح معاه گاع اللباسات الاخرى، وليتي لابغيتي تعومي و يعطيك بنادم التيقار خاصك تعومي بالبوركيني ماعندكش الاختيار بينو و بين البيكيني ! كيما كايوقع ديما فاش كاتخلي الافكار الظلامية تنتشر تحت مسمى الحرية، ديك الافكار كاتسيطر و أول حاجة كاتمسحها من طريقها هي ديك الحرية نيت لي وصلات بيها! نفس الشيء مع الحجاب و نفس الشيء كايوقع دابا مع البوركيني كانعيشو عصر ديكتاتورية البوركيني، ابشع اختراع رأسمالي.

إقرأ الخبر من مصدره