سهام البارودي – كود//
من الحوايج لي كانلقى راسي حالة فيهم فمّي وقتما سافرت ندوز العطلة فإسبانيا، هوا الحرية لي عند العيالات هنا الحق في الاستجمام، ماكاينش البيجامات فالبحر و البوركيني و دوك الحوايج ديال العالم الثالت، فشواطئ اسبانيا المرا كاتعوم بالمايو و لا غا بلتحت و تخلي بزازلها مرتاحين كايستمتعو بالما ديال البحر و الشميشة، كي كانت كبيرة كي صغيرة، غليضة رقيقة، طويلة… باش تعرف بلي حتى البزازل فيهم المرضيين و فيهم المساخيط، فشي بلادات متخلفة كايشوفو المرا عورة عمر البزولة مسكينة مايقيسها الما ديال البحر و تشوف الشميشة، كاتبقى مزموتة وسط البيجامات و الجلالب و الحوايج و الدرابل و خبي بزازلك و ستري راسك و ديري السوتيامات و لبسي شي حاجة واسعة، هادو البزازل المساخيط لي ماعند بوهم زهز ! كايتزادو مكتاب عليهم يتخباو حياتهم كاملة. البزازل المرضيين لا، المرضيين كايكبرو مرتاحين، كايعيشو حياة جنسية سوية و حتى حياة اجتماعية، من حقهم يتبحرو و يتشمشو و يبانو للناس و الناس ماشي بالضرورة كايشوفوهم بنظرة جنسية جوعانية.
الجميل فاسبانيا هوا فاش كاتشوف مرا كبيرة كاتعوم طوب ليس، بلا سوتيامات، بكامل الحرية كاتستمتع بالبحر و معاها راجلها و صحاباتها و عائلات هوما كايعومو طوب ليس، فحالها فحال الراجل، و حتى واحد ماكايبرگگ فيها و لا كايشوف بلي صافي غي حيت شرفات خاصها تشد الركنة تاكل القوت و تسنى الموت ! مامزموتاش وسط الزيوف و الدرور وسط شي كوزينة عرقانة و فيها ريحة المرقة مقابلة الكوكوط بينما ولادها كايستمتعو بالصيف و البحر، لا فاسبانيا حتى الشارفات كايعومو و كايتبحرو و كايتشمشو و كايطلقو بزازلهم فالبحر بلا مايديرونجيهم و لا ينقص منهم و لا يتحرش بيهم حتى شي واحد !
واش السبليون القوة الاقتصادية رقم طناش فالعالم ماشي رجال ؟
واحد حفدة القشتاليين ماشي رجال ؟
واش الالمان لي كايصنعو الميرسيديس ماشي رجال؟
واش النگالزة و الفرانساويين و الدانمارك و الرواسا و هادو كاملين لي عيالاتهم كايعومو بالمايو ماشي رجال ؟ ماكاينوضوش؟
طبعا رجال و نص و لكن بعرور ديالنا لاشاف شي بنت عندها طناشرعام كاتعوم بالدوبياس فالبحر غايدخل للفايسبوك يكتب ليك ” لباس المرأة يحكي تربية ابيها و غيرة اخيها و رجولة زوجها” كايعرفو الرجولة غا مع العيالات اما شي خدمة شي گرمومة شي مواطن يبني ليك دولة من اقوى الاقتصادات فالعالم فحال اسبانيا، الملاوي لابناها ليك.
قال الرجولة قال!