كود هناء ابو علي ////
حملة كبيرة كيعرض ليها محمد عبد النباوي الرئيس الاول لمحكمة النقض. حملة تجمعات فيها مصالح معارضين للنظام بمصالح اخرين ضرهم ما قام ويقوم به الرئيس المنتدب للمجلس الاعلى للسلطة القضائية للي تعين فهاد المنصب فمارس 2021 بعد ما كان رئيسا للنيابة العامة قبل.
عبد النباوي جا فسياق الاستمرارية فاصلاح القضاء وضمان الوسائل لاستقلاليتو. ورش كبير بزاف. مصالح كبيرة بزاف كتمس. ملاير كضيع على اغنياء الفساد والريع والصفقات المشبوهة.
لذا كان متوقع باللي يكون عبد النباوي مستهدف٬ لكن ماشي بهاد الدرجة. هاد التيار الفاسد المحارب لاي اصلاح فالقضاء لقى حليف طبيعي ديالو هو تيار اختار يضرب النظام الملكي المغربي برجالاتو. هادو باش عرفو باللي يسبو رئيس الدولة ولا يخرجو الاشاعات عليه والفايك ما شاداش٬ وهما يبداو يستهدفو رجالات فالنظام. كيختارو الاكفء ديما.
دارت حملات كبيرة وفيها حتى دول ضد فؤاد عالي الهمة مستشار الملك وعبد اللطيف الحموشي المدير العام للادارة العامة للامن الوطني ومدير المخابرات الداخلية وياسين المنصوري مدير الإدارة العامة للدراسات والمستندات المعروفة ب”لادجيد” =المخابرات الخارجية= وفيها طبعا كذلك محمد عبد النباوي.
الفكرة ساهلة عند هاد المعارضين للنظام واللي فيهم بعض ماشي كل لاعبين مع دول اجنبية٬ ايلى بغيتي تضرب نظام ولا تهدمو٬ ضرب رجالاتو. صورو نظام فاسد بالتركيز على الرجالات اللي كيخدمو مزيان. اللي كيتحركو مزيان. يعني ضرب راس السوق وبافتعال قصص وكذوب وفايك.
هادو عندهم حلفاء موضوعيين فالبلاد. فمثال عبد النباوي٬ كيف قلنا٬ كاينين اللي مستافدين من يبقى القضاء كلو تخلويض. كاين تيارات ضد كل محاولات اصلاح. تيار داخلي كيحركوه ناس من الداخل.
هاد الشي علاش كيفسر استهداف الرئيس المنتدب. كلشي كيوظفوه باش يضربوه. الشخصي مع المهني. كلشي باش يشوفو حفيد عبد النباوي خو بوعبيد الشرقي مول الزاوية الشرقاوية طايح. كاين حتى شي مدعين الصداقة معاه كيسيئو ليه وبزاف وبلا خبارو
Laisser un commentaire