احمد الطيب كود الرباط//
الصورة اللي زلزلات لمغاربة من البارح لعدد من الشباب كانو ناويين يحرگو٬ صدقو واكلين لعصا والعلامات فظهرهم تأكد هاد الشي. صورة الشباب العريانين اللي باركين بطريقة مهينة على الضس ويديهم فوق ريوسهم واللي الوكيل العام فتطوان خرج بيان كيقول باللي تفتح تحقيق٬ كاين فيها مسؤول.
هي وزارة الداخلية ممثلة فوزيرها عبد الوافي لفتيت. علاش؟ علاش الطونوبيلة اللي كاينة حدا صورة العار هي ديال القوات المساعدة. لمرود تابعين لوزارة الداخلية.
شفنا من البارح 16 شتنبر 2024 كاين اتجاه لتحميل المسؤولية لوزير الداخلية دون غيرو فهاد الصورة. حتى باش خرج اليوم مسؤول من عمالة المضيق يؤكد باللي الصورة حقيقية وباللي ماشي جديدة. عندها شي 10 ايام.
من غير ان المسؤول رقم على ملف الهجرة بين الحدود هو وزير الداخلية عبد الوافي لفتيت، الوزير الوحيد لي ما كيديرش خرجات اعلامية بنفسو. الوزارة دابا طورات بزاف باش دارت ناطق رسمي٬ لكن فهاد القضية ما هدرش.
ملف بحال الهجرة راه ملف حقوقي بامتياز وخاصو تواصل مختلف وفعال ومقنع ماشي يخرجو بلاغات او تصريحات.
لفتيت الوزير المختفي، الوزير لي كيبان سوبر فالبرلمان مكاين لي كينتقدو من غير فيدرالية اليسار لي عندها نائب واحد نبيلة منيب، الباقي كيضربو الطم باش يشوفوه. ماكيقدروش ينتقدوه.
يلا كان شي حد خصو اسئلة كتابية وشفوية ويتم استدعاءو للبرلمان فراه هو لفتيت. هنا غانشوفو مصداقية المعارضة لي كيبان ليها غير بايطاس الناطق الرسمي لي حتى هو فاشل فالتواصل.
ف19 يناير 2024، عقد فرناندو غراندي مارالاسكا، وزير الداخلية الإسباني، مع نظيره المغربي، عبد الوافي لفتيت، لقاء بالرباط، لمناقشة موضوع السيطرة على الهجرة غير الشرعية، حيث تم التطرق أيضا إلى مسألة تنشيط قنوات إعادة المهاجرين في وضع غير نظامي إلى المملكة، وفق ما نقلته مصادر إعلامية إسبانية مختلفة.
فهاد اللقاء كان كولشي، اتفقو وناقشو الملفات وحددو خريطة العمل، غير الفرق هو ان وزير الداخلية الاسباني معرض للمساءلة البرلمانية والاعلامية في حين لفتيت لا. بوحدو “فوق” الحكومة وفق الرقابة.
لفتيت وزير كينتمي لما قبل دستور 2011، خصو تغيير ويجيو وزراء اكثر تواصل ووضوحا. خاص وزراء الاستعداد المونديال والا فراه غاتكون اكبر شوهة لينا بهاد الوزراء.
