كود سبور//
احتج الجنوب افريقي رولاني موكوينا مدرب الوداد الرياضي على منع الجمهور من حضور عدد الماتشات فالبطولة الاحترافية لكرة القدم، ومن بينها ماتش الفريق الأحمر اليوم السبت، اللي كان فيه ضيف على حسنية أكادير فتيران برشيد، برسم الدورة 5، واللي تلعب بلا جمهور بقرار من السلطات.
https://www.facebook.com/share/v/17W3ZqLxU5/?mibextid=WC7FNe
وقال رولاني موكوينا مدرب الوداد الرياضي بعد تعادل الواك مع حسنية أكادير: “المشكل ديال الماتشات كايتلعبو بلا جمهور كايأثر بزاف، عندنا بزاف ديال المتابعين من النگليز وغيرها تقريبا 2 المليون، ملي كايشوفو الماتشات ما كايلقاوش الجمهور ما كايفهموش علاش”.
وكمل موكوينا: “حنا بلاد اللي درنا للدومي فينال ديال كاس العالم والثالثين فالألعاب الاولمبية وكا نتأهلو لگاع البطولات الكبيرة وغانظمو كاس افريقيا وكاس العالم، شنو هاد الصورة اللي كانعطيو لهاد الجوج او ثلاثة المليون اللي متبعين الوداد كل أسبوع فالعالم كامل”.
وزاد مدرب الوداد وقال: “كانتمنى من السلطات يشوفو شي حل لهذا الشي، وحنا محتاجين للجمهور ديالنا والكورة محتاجة للجمهور، وفاش كانلعبو للجمهور كانكونو اقوى واليوم احتاجيناهم وما كانوش”.
