كود سبور//
حاول يبرر الناخب الوطني وليد الركراكي، علاش ما كانش كيعيطش لجمال حركاس مدافع الوداد الرياضي، اللي يعتبر احسن مدافع فالبطولة الاحترافية خلال الثلاث سنوات الأخيرة، من ايام فاش كان كايلعب فالرجاء الرياضي، ولكن الركراكي قبل ما يعطي جواب مقنع بالدليل والبرهان، لقى راسو غير بوحدو داخل فخصام مع المنتقدين له اللي كايسولو علاش ما كانش كايعيط لحركاس فاش كان فالخضرا وما عيط له حتى ولا كيلعب مع الحمرا، وقال أنه هو براسو ما كايعرفش الاختيارات ديالو، قبل ما يتدارك الموقف ويجاوب.
وهضر الناخب الوطني وليد الركراكي خلال الندوة الصحافية اللي كاتسبق ماتش المغرب وأفريقيا الوسطى برسم اقصائيات كاس أفريقيا 2025، وقال: “عطيت لجمال حركاس الفرصة ديالو، وانا ما كانعطيش الكادوات، وأنا مقتنع به بالنظر للإصابات اللي عندنا وصغر السن اللي عند لاعبين اخرين، فأنا كانمشي مع اختيار احسن مدافع عندنا فالبطولة، كنت نقدر نجرب مدافع من أوروبا كيفما درت من قبل ولكن كنت باغي نشوف جمال حركاس، كنت نقدر نعيط من قبل يمكن التوقيت ما فهموش شي وحدين علاش عيطت له دابا ولكن هذا كايبقى اختيار ديالي ومرة مرة كاين اختيار اللي ما تقدروش تفهموه أنتما وحتى أنا ما كانفهموش، علاش دابا علاش من قبل وعلاش ماشي غدا ولكن هادي هي الاختيارات”.
وكمل الركراكي وقال: “دابا جمال حركاس عندو الفرصة هو اللي خاصو يبين بالضغط والى عطيتو الوقت ديالو خاصو يلعب كفيمت كايلعب ديما ومادام جا الا وعندو إمكانيات وبحال اللي قلت هو واحد اللاعب اللي غايلعب مونديال الاندية هذا العام، وانا باغي ديما اللاعبين اللي كايلعبو شومبيونزليك وهو غايلعب كثر من شومبيونزليك، غايلعب كاس العالم للاندية يمكن غايلعبو ضد ريال مدريد وبايرن ميونخ وهو لاعب غايلعب مسابقات كبيرة هذا العام بالاضافة للسوبر ليك وعندو التجربة”.