محمد سقراط-كود///
العام لي فات كنت فسبيطار الدولة من بعد واحد الكسيدة وحتاجيت نخلص الراديو ومكنتش هاز معايا الفلوس كاش معايا غير لاكارط ، واظطريت نخرج على رجليا ومعطوب بالحريق باش نقلب على منين نتيري عاد رجعت للسبيطار، هادي ماشي أول مرة كنحتاج نخلص فشي مؤسسة عمومية أو فشي إدارة بلاكارط وكنلقى معندهمش هاد الخدمة، سير تيري وجيب الفلوس وراق مكمشين بحال الى غادي تقدى طريفة من عند البزناز، باراجات ديال البوليس والجوندارم حتى هوما هكاك، واحد المرة مكنتش هاز معايا الفلوس وخليت البيرمي ومكنتش عارف القانون تهاونت حتى دازت جوج سيمانات عاد خلصت وتزاد ثمن المخالفة، عاد رجعت للكوميسارية خرجت البيرمي وهاد الطوالة كلها كنت غادي نتجنبها كون كانوا البوليس كيتخلصوا بلاكارط.
في المحكمة كذلك كنظن واقيلة أغلب إدارات الدولة مكيقبلوش الخلاص بلاكارط، هادشي بلا منهدرو على الأطباء والمصحات والصيدليات، وصحاب البياس ديال الطوموبيلات والعديد من القطاعات كيتعاملوا غير بالكاش، راه خاص الدولة تبدى هي اللولة باش يتبعها الشعب ماشي العكس، خاص الدولة تعمم على جميع الإدارات ديالها الخلاص بلاكارط وتدير كيشيات في كاع الإدارات، المحاكم كمثال كاين ناس كيخلصوا غرامات كانوا محكومين بيها أو سومة كراء للصندوق والعديد من التعاملات النقدية، ولكن خاص تجي هاز معاك الفلوس فجيبك عوض تخلص غير بلاكارط وهانتا هاني، ويكون حتى كيشي في حالة بغيتي تيري باش تدور مع شي شاهد أو تفاصل مع شي حد، القطاع البنكي عموما متنخلف في المغرب من عدة نواحي وغارق في البيروقراطية وتبغي تشد غير كريدي خاص عرام ديال تعقيدات، بينما في الدول العظمى بحال ميريكان يمكن تشد كريدي باش تخلص كريدي درتيه برهن الكريدي ديال الدار، طبعا هادشي وصل لأزمة ألفين وتمنية ولكن هاديك غير الرأس مالية تصلح نفسها وصافي، راه باقا ميريكان قوة عظمى واقتصاد قوي وشركات عملاقة.
الجواهري حلقو نشف كل مرة يذكر هاد الموضوع ولكن راه خاص قرارات من الدولة وتبدى هي اللولة ويوليو كل قطاعاتها كيقبلو الخلاص بلاكارط ، ومن بعد تدير قوانين تفرضوا على القطاع الخاص، كتلقى مصحة خاصة دايرة الكيشي ديال بانكطة في باب المصحة ولداخل معندهمش الخلاص بلاكارط، وها الكاش كثير كيدور خارج الاقتصاد حقا هو لي كينفع في الأزمات، وحتى دوك الضرائب لي كتمشي للدولة باش يتدارو المشاريع الكبرى، راه كيخسرو البعض منهم وزراء في صفقات معندها معنى، أما المنتخبون كل مرة مشدود واحد في الحبس، زعمة راه باغين نوليو دولة محترمة وكاين شي احترام بإقتصاد جزء كبير منو غير فالنوار، راه الهند فيها مليار والصرف ونهار بغاو يهيكلوا الاقتصاد دغية تاخدوا قرارت جريئة جمعوا الفلوس القديمة وبدلوها بخرى جديدة وعرفوا بنادم شحال عندو وشحال كيكساب، وابالي الدولة قبل مايسالي.
