كود سبور//
تألقو اللاعبين الدوليين المغاربة، اليوم الخميس فالمسابقات الاوربية اليوروبا ليگ والكونفرونس ليگ، ودارو ماتشات مزيانين.
والبداية بماتش مانشستر يونايتد وفنربخشة التركي، فتركيا، واللي عرف مشاركة نصير مزراوي مع المان، وسفيان أمرابط ويوسف النصيري مع فنربخشة، وسالاو بالتعادل الايجابي واحد لوحد، وهدف التعادل لفنربخشة ماركاه يوسف النصيري برأسية زوينة فالدقيقة 49، وخدا كل فريق نقطة واحدة.
ونجح أيوب الكعبي فقيادة أولمبياكوس اليوناني إلى تحقيق الرباح على مالمو السويدي فالسويد بنتيجة هدف واحد لزيرو، وقدر يماركي هدف الرباح فالدقيقة 30 وحافظو على هذا الهدف هتى سالا الماتش، وخداو 3 بوان.
نايف أكرد حتى هو بدا كايرجع مستواه، ودار ماتش مزيان مع ريال سوسيداد الاسباني ضد فريق ماكابي تل أبيب، وتلعب الماتش فصربيا بسبب الحرب اللي فإسرائيل، وربحوه ريال سوسيداد بنتيجة 2 لواحد، وخداو 3 بوان.
أما فالكونفرونس ليگ، فتألق عبد الصمد الزلزولي مع ريال بيتيس، ودار ماتش واعر ضد كوبنهاگن فالصبليون، واخا سالاو تعادل هدف لكل فريق، والزلزولي هو اللي ماركا هدف التقدم لريال بيتيس، خداو نقطة لكل فريق.
وتعرض عز الدين أوناحي لخسارة كبيرة مع الفريق ديالو باناثينايكوس اليوناني أما تشيلسي النگليزي فاليوناني، وخسرو بنتيخة 4 لواحد.
