واش غادي يكون العدل غدا فقضية 150 هكتار ببرشيد. علاش لا الرئيس الاول لمحكمة النقض ولا القاضي منصف حسن بثو فطلب التجريح

كود سعيد الشاوي سطات ///

غدا كاينة جلسة اخرى فقضية الشفعة اللي كتجمع بين بوشعيب العمري وبين شي حد كيقول باللي كيشفع فيه. هاد القضية معروفة بقضية 150 هكتار ديال برشيد. قضية مثيرة وبزاف. قضية الشفعة بعد ما تسجلات الارض وتحفظات اكثر اثارة. غدا لثلاث 28 اكتوبر 2024 غادية دوز هاد القضية اللي كل مرة فيها الجديد.

اخر مسلسل غرائبي فيها هو التجريح اللي قدمو محامي العمري ضد القاضي منصف حسن اللي غادي يحكم غدا.

علاش التجريح؟ لان القاضية السابقة مليكة العمري تحكم عليها  ف19 شتنبر 2024 فهيئة الجنحي التلبسي بابتدائية عين السبع فكازا  ب3 سنين حبسا نافذا. حكم جا بعد فيديو رسالة للملك محمد السادس علي قضية عائلتها اللي كتهم 150 هكتار فبرشيد.  القاضية ادينت ب”بث و توزيع ادعاءات ووقائع كاذبة بهدف المس بالحياة الخاصة للأشخاص” و”التشهير بهم وإهانة رجال القضاء” و”إهانة الضابطة القضائية بالتبليغ عن جريمة يعلم بعدم حدوثها”، و”إهانة هيئة منظمة قانونا و”تحقير مقررات قضائية بواسطة الأقوال لقصد المس بسلطة القضاء واستقلاله”، و”الإدلاء علنا بأقوال قصد التأتير على قرارات رجال القضاء قبل صدور حكم غير قابل للطعن”.  

تحكم عليها بعد ما دارت فيديو شهير لبسات لبيض ووجهات رسالة لسيدنا وفيها ذكرات القاضي منصف حسن. 
تحكم عليها على قضية غدا غادي يبث فيها هاد القاضي. عليها كان طلب محامي العمري بالتجريح. 

كاين قضاة غير كتبو عليهم صحافيين وباش كانت قضية مع هاد الصحافي اللي انتاقدهم هو براسو دار التجريح ومشى فحالو. دابا القاضية السابقة مليكة العمري من التهم اللي غرقوها ب3 سنين كاين “لإدلاء علنا بأقوال قصد التأتير على قرارات رجال القضاء قبل صدور حكم غير قابل للطعن”. كيهدرو على منصف حسن. راه يستحيل هاد القاضي يحكم بلا ما يكون تأثر نفسيا بفيديو العمري. 

كان عليه هو يدير التجريح بلا ما يطلبو المحامي. ما مفهومش علاش ما داروش هو. كيفاش شي قاضي يصر يبقى فملف دخلات بسبابو متهمة للحبس. 

حاجة اخرى ما مفهوماش هو موقف الرئيس الاول لمحكمة النقض اللي وجه ليه محامي بوشعيب العمري طلب التجريح. كان خاصو يبث فيه قبل ويحيد هاد القاضي. 

هادي قضية كلها فشي شكل. خاص تكون محاكمة عادلة. يستحيل يكون يتحقق هاد العدل بشكل كامل بقاضي غادي يكون متأثر بكلام القاضية السابقة العمري وللي خدات عليه 3 حبس نافذ.

غدا امتحان كبير لقضاء بلادنا٬ فقضية كانت غادية تكون عادية. اللي كيبغي هاد لبلاد ما يبغيش الظلم. يبعد على الشبهات. غدا نشوفو هاد القضية فين غادية

إقرأ الخبر من مصدره