سهام البارودي – كود//
الاغلبية الساحقة ديال المغاربة مابقاوش كايولدو بزاف حسب الارقام الاخيرة ديال المندوبية السامية للتخطيط، و هاد الظاهرة ماشي جديدة حيت الارقام كانت غادية فواحد المنحى تراجعي سنوات و سنوات هادي.
غايجيو يقولو ليك حقا السبب هوا اختلاف نمط الحياة و تأخر سن الزواج و الرغبة في عدم الانجاب و بزاف ديال الهضرة لي كاينة ماشي ماكايناش و لكن السبب الحقيقي وراء هادشي كامل راه هوا الوعي بالخطر ديال الزلط ماشي الزلط حيت المغاربة كانو كايعيشو فالزلط شحال هادي و كايولدو الاولاد و البنات و لكن دابا الاختلاف لي كاين هوا انه المغاربة وعاو بالضرر و الخطر الكبير لي كايشكلو الزلط على الأسرة بصفة عامة و الطفل بصفة خاصة.
حيت من غير هيام سطار و بعض الهبّل لي مازال كايآمنو بديك الجملة ديال “كولا يتزاد برزقو” و عندهم استعداد يغامرو بولادهم و يسيفطوهم يسعاو و يمسحو الجاج فالفوروجات و يبيعو الورد فلاكوط راه الاغلبية الساحقة ديال المغاربة مابقاوش قادّين ماديا على الاولاد، وعاو بلي مايمكنش تولد بزاف و تعول على شي معجزة توكلهم ليك و تسيفط ليك ليهم الباكيات ديال ليكوش و الحكاك ديال نان و نورسي ! المغاربة وعاو بلي الولاد راه استثمار حقيقي و الله يا يمّاك و ماعطيتيه من وقتك و رزقك و خسرتي عليه لاكانت منّو الكاينة.
واخا مازال ماكاينش واحد الوعي كافي بالدور ديال الامومة و الابوة، ماكاينش وعي كافي بشنو هوا الطفل و شنو خاصو باش يكبر سوي نفسانيا و لكن المغربي انسان برغماتي شاف بعينيه شنو دار الزلط فالاجيال السابقة و مابقاش باغي يولد الاولاد الى ماعندوش باش يتحمل مسؤوليتهم و يكون معاهم و مابقاش متأثر بديك الفكرة الغبية ديال كولا يتزاد برزقو.
و حتى الدولة ماكاتعاونش باش المغربي يولد و يزيد يولد، هزات يديها على المدرسة العمومية و على قطاع الصحة، دابا وليتي قبل ماتمشي تخطب خاصك تشوف واش عندك فلوس المدرسة الخاصة د الدري قبل فلوس البوكي د الورد، ماعندكش تكمش آ ولد عمّي.
الفكرة بحد ذاتها مزيانة و كادل على انه عكس مصر و ليبيا و بعض الدول الافريقية لي مازال عايشين فالزلط و التفرعين، المغاربة اوموان فهمو و عاقو بالقالب و ماباغينش يولدو الا ماعندهمش باش يكبرو دوك الاولاد و يوفرو ليهم واحد المستوى د العيش يحفظ كرامتهم.
Laisser un commentaire