بغينا نعرفوا إحصائيا واش المغربي الخصوبة عندو كتكون طالعة مع الأجنبيات كثر من المغربيات، وكذلك واش المغربيات كيولدو كثر مع الأجانب عوض المغاربة، و واش الشركاء المغاربة فاش كيهاجروا برا وكيلقاو دول فيها الرعاية الاجتماعية والصحة والتعليم وجودة الحياة طالعة واش كيولدوا كثر من المغاربة لي بقاو هنا

محمد سقراط-كود///

خاص المندوبية السامية للتخطيط تعطينا أرقام على عدد المغربيات لي مزوجين بأجانب وعايشين هنا وشحال عندهم ديال الولاد وتقارنهم بعدد المغاربة الذكور لي مزوجين بأجنبيات وعدد الأطفال لي عندهم باش نعرفوا فين كاين هاد الموشكيل لي كيهدد المغاربة ديال قلة الخصوبة واش عند الرجال أو النسا، حيت على مايبدو من خلال الناس لي شفت وكنعرف و ولاد الحومة وبناتها، لاحظت أن المغربيات لي كياخدو أجانب كيولدوا معاهم دغية وكثر من واحد واخا يكونوا الأجانب كبار في السن كيقدرو يجددو الدماء مع المغربيات وبحكم الطبيعة كتمكن الراجل أنه يولد واخا في سن متأخرة، بينما المغاربة لي كياخدو أجنبيات في الغالب كياخدوهم من بعد سن اليأس خصوصا هادوك لي تزوجوا بدافع الهجرة، مكنهدروش هنا على شاب طالب متفوق مشا يكمل قرايتو في أوروبا راه في الغالب كيرتابط من الوسط الجامعي لي كيعيش فيه، كيتلاقى مع طالبة خرى سواء من البلد المستقبل أو من بلاد خرى وكيرتابط بيها، أنا كنهدر على دوك لي كيشاطيو مع الكاوريات بكوكل ترجمة.

راه مهم للمغاربة يفهموا فين كاين هاد الموشكيل لي كيهدد المغاربة بالإنقراض وقبل هادشي كيهددهم بإنكماش إقتصادي فاش غادي يجي واحد الوقت غادي يوليو الشياب والناس لي كبار في العمر أكثر عدد من الشباب القادرين على العمل، الدول المرفحة راه كتخلق توازن وكتجدد الدماء بالهجرة بحال لي دارت ألمانيا وكان داكشي مفيد ليها ولإقتصادها، ولكن دولة بحال المغرب عايشة على باب الله ولادها براسهم كيهاجروا برأ، والمهاجرين لي كيجيو ليها دايرينها غير منطقة عبور ماشي إستقرار، يقدر مستقبلا مع المشاريع الكبرى وتنظيم كاس العالم أنها تولي منطقة إستقرار وغاية للهجرة، ويقدر هادشي يبدل البنية الديمغرافية ديال المغرب ونوليو في المستقبل عوض نعولوا على أبناء المهاجرين في أوروبا غادي نعولوا على أبناء المهاجرين للمغرب ولي ستقروا وولدوا وكنظن داك الساعة احتمال كبير ناخدو كاس افريقيا أخيرا.

بغيا نعرفوا إحصائيا واش المغربي الخصوبة عندو كتكون طالعة مع الأجنبيات كثر من المغربيات، وكذلك واش المغربيات كيولدو كثر مع الأجانب عوض المغاربة، و واش الشركاء المغاربة فاش كيهاجروا برا وكيلقاو دول فيها الرعاية الاجتماعية والصحة والتعليم وجودة الحياة طالعة واش كيولدوا كثر من المغاربة لي بقاو هنا، حيت راه من خلال الأرقام يمكن يتداروا إحصائيات غادي يعطيونا فكرة مزيانة على مكمن الخلل وفين كاين الموشكيل بالظبط، واش في المغاربة أو في البلاد وإقتصادها ووضعيتها الاجتماعية والطريق فين غادا وكيفاش كيشوفوا مواطنيها الأفق والمستقبل والجو العام واش صالح للولاد أو لا.

إقرأ الخبر من مصدره