محمد سقراط-كود///
هاداك الأوروبي لي كيحتارم القانون وكيقطع الشانطي من الشراطي ومكيبولش في الزنقة وكيحتارم حق الأسبقية وكيمارس التمدن الحقيقي واش زعمة تزاد بحال هكاك أو عندو شي جينات مبدلة علينا خاصة بالتمدن وإحترام القانون؟ طبعا لا، فقط أن الدولة قدرات تربي المواطنين بنظام غرامات فعال وكيتطبق على كولشي والفالطة فيه بالكبوط، مثلا الدول الإسكندنافية لي كيتعطى بيها المثال في إحترام القانون راه عندها نظام غرامات قاصح بزاف تقدر تدوز حياتك كتخدم غير على البروصيات إلى ماتحضرتيش صحة عليك، النرويج كتوصل غرامات السرعة لأكثر من ألف أورو، وكذلك غرامات التبول في الشارع وباقي السلوكات الغير حضارية، والى شدوك غادي تخلص، والى مخلصتيش غادي تدخل في دوامة بيروقراطية معقدة غادي تكره معاها حياتك، لذا بزز منهم تحضرو وتمدنو وأصبح يعطى بهم المثل في إحترام القانون وتطبيقه.
القانون راه معندو حتى قيمة الى مكانش غادي يتطبق بصرامة وبمساواة على الجميع، والمغرب كيضيع عليه فلوس كثيرة من الغرامات الزجرية، عوض يستغلها راه كيفرض الضرائب على الموظفين وعلى المنتوجات وعلى السلع المستوردة، راه فلوس كثيرة كتضيع على الدولة بسباب عدم تطبيق القانون بعدالة ومساواة، وهادشي كيخلي على المواطن يحس بالحكرة في عدة مواقف فاش مثلا واحد راكب على موطور غادي لخدمتو نسا مادارش الكاسك وهادي مخالفة خاصو يخلص عليها، ولكن يقدر يخلص هاد المخالفة جنب طوموبيل طالعة فوق الطروطوار ديال مسؤول أو موظف حكومي وماغادي يهدر معاه حد، ماغادي يجي الديباناج ياخد ليه الطوموبيل، ونتا الى كنتي غير مواطن أيها الناس غادي يتطبق عليك القانون وبصرامة.
محاربة هركاوة راه واجب على الدولة وخاصها تبدى بيه هي اللولة في صفوفها بعدا، عاد تدوز للشعب وتطبق القانون بعدالة ماشي بالإنتقائية والحكرة، شوف غير فاش كتنوض شي حملة مثلا على الماطر كتلقى الديباناج عامر غير بماطر الشينوا كأنه في المغرب مكاين تيماكس بلا وراق مكاين ماطر كبار معدلين ومبدلين فيهم، طبعا راه حتى أليات تطبيق القانون والميزانية المرصودة خاصها تكون كبيرة، لأن العائدات كبيرة بحال في العالم كامل، بوليسي ماغاديش يغامر بحياتو باش يشد تيماكس مولاه انتحاري يقدر واحد فيهم يموت في مطاردة، ولكن راه كاين آليات أخرى وكاين طرق عند المخزن، راه حنا دولة عريقة ماشي جمهورية دالبنان، كذلك الحال في كل المجالات، مجاتش تريب قهوة هنا وقهوة لهيه مستعمرة الملك العمومي وباقا خدامة، وماجاتش تريب قهوة ويدوز وقت قليل ويعاود يبني داكشي ويبقى خدام على خاطرو وتعاودو تريبو ليه عاوتاني، راه كولشي واضح دول صغيرة بنصف ساكنة المغرب أو أقل كتدخل مئات ملايين الدولارات من غرامات السير فقط، بينما المغرب مضيع عليه بزاف ديال الفلوس مهدورة كتضيع غير هكاك، حتى الحبس عامر بناس تهمهم خفيفة وباغين يدفعوا غرامات وعندهم باش، وا راه فلوس هادو في بلاد بلا موارد طبيعية كبيرة.