القصة ديال رضى ولد الشينوية تصلاح فيلم ويدّي بيه عيّوش جائزة فكان. كيفاش من درّي سمحات فيه مّو عندو ثلت سنين وكبر متشرّد فالزنقة ودوز الحبس والاغتصاب، كايضرب الكارطة وكايدير الليلات د الجذبة، غايولي ميليونير بفضل السوشل ميديا فيديواتو كاضرب ملايين المشاهدات وكايعيطو ليه شركات عقارية كبيرة يدير ليهم الإشهارات واخا ماقاريش الماركوتينغ‎

سهام البارودي ـ كود//

واحد فحال رضى ولد الشينوية أنا شخصيا ماجاتنيش غريبة أنه يكون متورط فقضايا ديال الوساطة والاتجار فالبشر (طبعا المتهم بريء حتى تثبت إدانته)، وبعيدا عن التهم لي كاتواجهو اليوم غير القصَة ديالو من الطفولة حتى لدابا راها كفيلة باش تخلينا قدّام وحدة من الشخصيات الأكثر دهاء وحربائية فالسوشل ميديا.

أه رضى ماقاريش وماكايعرفش ينطق الكلمات بالفرونسي وكايكتب عناوين شابعة أخطاء فحال”اجو تشفو شقة احلام ديل” باش يقوليك “أجيو تشوفو شقة الأحلام ديالي” ولكن واخا هاكاك الفيديوات ديالو كايضربو الملايين ديال المشاهدات وكايطلعو للطوندونس لدرجة أنه وصل يدير الإشهار لكبريات الشركات العقارية وماركات معروفة وماكايناش السيمانة لي كادوز عندو بلا كولابوراسيونات وإشهارات و اللعاقة داخلة والذهوبات ملبوسة.

رضى موراه قصة إنسانية شبعانة تكرفيص وعنف، لدرجة لابغيتي تشوف بعينيك شنو ممكن الزلط والتفكك الأسري يسبب للإنسان شوف رضى ولد الشينوية.

سمحات فيه مّو وهوا عندو ثلت سنين ولاحو باه للزنقة وبقا كايتمرمد وكايتعاطى وعاش حياة التشرد والزلط ودوز الحبس والشفرة والاغتصاب، وكايضرب الكارطة وكايدير الليالي ديال الجذبة وكايخدم للبنات فالإمارات وتعاشر مع الشينوية لي كايعيط ليها موّي واخا فرق السن بيناتهم ماكبيرش بزاف ومايمكنش تولدو، وصنع لراسو أم بزز وعائلة بزز وخّوت بزّز وروابط عائلية بزز وقدر بالدهاء ديالو يصنع لراسو حضور فالسوشل ميديا بالصورة لي بغا هوا، بالذهب والحركات الأنثوية والمعاطية والمشاطية ورافض يعترف بالميول الجنسي ديالو وكل شهر كايخطب وحدة، حتى ولا من الوجوه المعروفة فالسوشل ميديا لي مسيطرة على عالم الإشهار، رضى عطيه غا الفلوس، يدير ليك الإشهار د اللحسة والبيجامات والذهب والفوطات الصحية وحتى العقارات… ضاربتي مع شي وحدة فالسوشل ميديا وبغيتي لي ينگدو ليها ويتنمر عليها ويبقا تابعها بالفيديوات تايمرضها… رضى هوا الرجل المناسب لهاد الوظيفة هادي.

كيفاش واحد بالحياة لي عاشها رضى غانتسناو منو يعطي الحب والحنان ويتعامل كإنسان سوي مع الحياة والناس؟ واحد بالماضي ديال رضى ولد الشنيوية راه احسن فيرسيون يمكن يوصل ليها هي هادي لي واصل ليها، مؤثر عندو ملايين المتابعين، كايدير الإشهارات لشركات كبيرة وكايدخل الزبابل د الفلوس وصانع لراسو عائلة.

اليوم رضى كاتواجهو تهم بزاف ولكن لي متأكدة منو أنه واخا يدخل للحبس وراه ماشي أول مرة غايدخل ليه، غايخرج منو أكثر قوة و أكثر عطاء، حيت لي فحال رضى، شافو اللخر فالحياة، على شنو غايكون أقود من أنك تعيش اليتم والتشرد والمثلية فالمغرب؟ ماكاينش!

إقرأ الخبر من مصدره