مرة اخرى يفشل بنسعيد فالامتحان. جاب صاحبو لرئاسة لجنة تحكيم الصحافة وخلى لغزيوي الصحافي اللي كيعرف گاع الاجناس وولد الدومين وبداه من اللول وكاين هجوم اسلامي عليه وعلي “الاحداث”

كود كازا //

محمد بنسعيد وزير الشباب والثقافة والتواصل نصب البارح لثلاث 26 نونبر 2024 اعضاء لجنة تحكيم لجنة تحكيم الجائزة الوطنية الكبرى للصحافة برسم الدورة الـ 22

هاد اللجنة عطاها بنسعيد لصاحبو عزيز بوستة. سماه رئيس اللجنة. بدا الصحافة بعد عشرين فبراير بعد تجارب فالادارة التجارية لمجلة “تيل كيل” باش كان خدام مع ولد اختو احمد رضى بنشمسي بعدها خدم شوية فنفس الدومين مع توفيق بوعشرين وشوية مع علي انوزلا قبل ما يدير موقع سماه “بانوراما بوست”.

فهاد اللجنة كاين عبد الكريم أقرقاب، وحسن لقوتلي، ولحبيب العسري، ومنال الأخضري، وعبد الله الترابي، وعبد الحفيظ لمنور، وحجيبة ماء العينين، وفرحانة عياش، وعبد الرحيم العسري، والمختار الغزيوي.

تصورو اقرقاب ديال لاماب كيفهم فالصحافة وفاجناسها كثر من الرئيس نفس الشيء بالنسبة لترابي ولمنور…

هاد اللجنة كان خاص ياخد الرئاسة ديالها بالدرجة الاولى المختار لغزيوي مدير نشر “الاحداث المغربية” ماشي غير حقاش هاد الجورنال فمواجهة الفكر الاصولي وشفنا كيفاش الامين العام لحزب العدالة والتنمية خرج ما يشبه الفتوى ضد المجموعة اللي منها “الاحداث” بسباب مقال للناشر الصحافي رئيس المجموعة احمد الشرعي٬ ماشي غير هاد الشي كان لغزيوي ياخد الرئاسة ولكن هاد الصحافي بدا المهنة من الصفر كيف كيقولو. خبر كل تفاصيلها. دار الخبر. الحوار. التحقيق. الربورطاج. قبل ما يوصل للرأي.

تجربة طويلة فهاد الميدان. يستاحق الرئاسة.

بنسعيد كان عندو موقف اخر. فرق كبير بين اللي بدا الصحافة من اساسها وبين اللي بدا الصحافة بالرأي.

مرة اخرى بنسعيد سقط فالامتحان. بين عدم قدرتو على فهم القطاع.

إقرأ الخبر من مصدره