صراع فالوداد: تسجيل صوتي كتنشرو “گود” لمحمد الديساوي يكشف خلافات كبيرة. جمد عضويتو وهاجم مكتب بوه هو ونائب الرئيس

كود سبور – كازا //

https://www.facebook.com/share/v/15CnuoxcWt/?mibextid=WC7FNe

تسجيل صوتي ينشره “گود” لسيمو الديساوي، ولد السياسي ورجل الأعمال المعروف كمال الديساوي نائب رئيس الوداد هشام أيت منا، اللي كيهدر فيه على تجميد العضوية ديالو فمؤسسة المنخرط من بعد خلاف كبير مع الرئيس وباقي المنخرطين. ولد الديساوي قال باللي حاول بجميع الطرق مع أيت منا باش يقنعو يبدل وحدة الفقرة فمحضر الجمع العام اللي داز فشهر يوليوز اللي فات، وهاد الفقرة كتهم التحكم فالرأسمال ديال الشركة، حاجة اللي دارت جدل كبير بين المنخرطين وصلات لحد التهديد برفع دعوى بالتزوير في وجه المكتب.

الديساوي بقى مدة وهو كيدير حملة باش يقنع المنخرطين وحتى باه يضغطو على الرئيس باش يبدل هاد الفقرة، ولكن أيت منا اقترح يدخلو هاد النقطة فالجمع العام الاستثنائي الجاي باش يصوتو عليها، ولكن هاد الحل ما عجبش الديساوي وصحابو. البارح كان تصويت اللي من خلالو المنخرطين رفضو يديرو بيان صحفي على هاد النقطة وشي نقاط اخرى فحال موضوع فرع التيكواندو وهاد الشي زاد شعل الأوضاع.

بزاف ديال المنخرطين شافو بأن المواضيع اللي كانت مطروحة فالتصويت، بحال فرع التيكواندو، الوضع ديال التركيبة البشرية، ولا مالية النادي، ما عندهاش أهمية كبيرة، وقالو باللي غير محاولات ديال التشويش على الإدارة ديال أيت منا. من بعد هاد التصويت، السيمو الديساوي قرر يخرج من مجموعة واتساب ديال المنخرطين، فخطوة كيبان فيها أن الخلاف كيتفاقم.

دابا كاين تساؤلات على شنو غادي يدير باه، اللي ممكن حتى هو يجمد العضوية ديالو ولا ينسحب من المكتب. هاد الوضع فالنادي كيبان ماشي غير مشكل إداري بسيط، ولكن صراع على مركز القرار في النادي وضعف كبير لأيت منا والمكتب ديالو.

التحدي الكبير هو واش ايت منا غادي يقدر يتجاوز هاد المشاكل ويحافظ على الاستقرار، ولا غادي يمشي فحالو ويتكلف النائب ديالو كمال الديساوي؟

إقرأ الخبر من مصدره