الصراحة أنا مآمن بوهبي كواحد باغي التغيير والتحديث ديال نظام العدالة في المغرب ومع ذلك بعد المرات كيجيني أن تصريحاتوا غادا في واد وشنو كتدير النيابة العامة غادي في واد آخر، في القضية ديال موقع كود ضد مول الفوقية النيابة العامة لحد الآن محركاتش الملف علما أن وهبي كيطلب من المواطنين أنهم يمشيو للعدالة تاخد ليهم حقهم من كل واحد هددهم أو حرض عليهم أو مس كرامتهم وسمعتهم وهادشي لي وقع وماشفنا عدالة

محمد سقراط-كود///

كنظن أن الوزير وهبي واحد من أعظم الوزراء لي دازو في تاريخ المغرب ” من ناحية الوزراء راه تاريخ قصير بزاف”. لأنه كيقود حملة من التغييرات الجذرية لي غادي تغير منظومة العدالة في المغرب، ولي مازعم قبل منو تاواحد يقرب ليها، كولشي كان كيخاف من هدرة الشارع وضغط هركاوة والإسلاميين، ولكن وهبي بوحدو بلا حتى حزب يدعمه محامي كولشي، وكيتعرض لهجومات شبه يومية وشيطنة واضحة ومع ذلك صامد وممسوقش وغادي زاطم باش يحسن من نظام العدالة المغربي، غير هو بعد المرات عاوتاني كيجيني غير داوي وصافي، بزاف ديال الحاجات لي كيقول وكيشرح أو كيطلب من المواطن نيت يديرها أو كيقول أنها من حقو مكتلقاش صدى في الواقع.

آخر فيديو ديالو منتاشر حاليا قال وسط البرلمان “أنه كيطلب من المغاربة أن أي واحد آذاهم أو نشؤر عليهم خبر كاذب أو إدعاء أنهم يلجؤوا للقضاء، وأنه لايدخل في حرية التعبير المساس بسمعة الناس وكرامتهم وحياتهم الخاصة وكتطالب المغاربة يحركوا الدعاوى والقضاء غادي يتدخل وينصفهم”، في الواقع هادشي لي درت شي عامين دابا سبني غلام أبو النعيم مول الفوقية وسب ليا عائلتي ومس بالسمعة ديالي وهددنني أنا وطاقم كود، وقدمت شكاية وتدار محضر عند البوليس وتقدم لنيابة العامة، وبقى هكاك جامد ليومنا هذا، مكاين حتى شي حركة، حيت حسب التصريح ديال وهبي وسط البرلمان أن السب والمس بالسمعة وكرامة الناس راه جريمة يعاقب عليها القانون إذن علاش حقي ماخداتوش ليا العدالة.

الصراحة أنا مآمن بوهبي كواحد باغي التغيير والتحديث ديال نظام العدالة في المغرب، والإستوزار ديالو على رأس وزارة العدل فرصة للمغرب وللمغاربة وخصوصا الأجيال لي طالعة أنها تعيش في هامش من الحرية ومحمية بقوة القانون، ومع ذلك بعد المرات كيجيني غير داوي خاوي مادام أن تصريحاتوا غادا في واد وشنو كتدير النيابة العامة غادي في واد آخر، في القضية ديالي كاين سب وتهديد وتحريض واضح، ومع ذلك النيابة العامة محركاتش الملف علما أنه كيمس بحرية التعبير والأمن الجسدي والنفسي للصحافيين في المغرب، لدرجة فاش كتسمع تصريح وهبي وتشوف شنو دارت النيابة العامة في هاد الملف ديال دعاوى موقع كود والمشتغلين فيه ضد مول الفوقية، غادي يجيب ليك الله بلي النيابة العامة ممسوقاش نهائيا لتصريحات وزير العدل ومواخدينوش بالجدية لي خاص، يقدرو يكونوا ملفات معروضة عليهم أهم ولكن هذا راه ملف كيمس بالسلامة الشخصية للصحفيين بسباب تحريض ديال متشدد إسلامي كيهدد البلاد بحرب أهلية ومع ذلك ماتخادش بجدية.

إقرأ الخبر من مصدره