توما كيفاش نفس الناس لي كيقولوا دابا من حق غالي يعبر على رأيو بخصوص الوحدة الترابية، هوما نيت لي كانوا ضد احمد الشرعي يعبر على رأيو حتى هو ويوقف ضد المحكمة الدولية لتجريمها نتنياهو؟

محمد سقراط-كود//

توما كيفاش نفس الناس لي كيقولوا دابا من حق غالي يعبر على رأيو بخصوص الوحدة الترابية، هوما نيت لي كانوا ضد احمد الشرعي يعبر على رأيو حتى هو ويوقف ضد المحكمة الدولية لتجريمها نتنياهو، قضية وطنية كتهم المغاربة وكتأثر على حياتهم بطريقة مباشرة هانية يتعطى فيها رأي يقدر يكون مخالف لرأي اغلب المغاربة ومخالف لتوجه الدولة، بينما شفنا التكفير والاقصاء وحملات تقامت ضد الشرعي حيت عطا موقف ورأي شخصي للصراع الفلسطيني الإسرائيلي وهو رأي غير ملزم للمغاربة ويخص صاحبه، وماعتدى فيه على تاشي حد ومع ذلك كاين لي تعامل معاه كواحد دار جريمة في حق الإنسانية.

واخا موقف غالي راه معروف من قبل وكان موقف الدولة نيت وخدمات عليه، سيرو للرحامنة للمنطقة ديالنا بالظبط وغادي تلقاو دواور مهجورين تم ترحيلهم للسمارة باش يشاركوا في تحديد المصير، ماغاديش نسميوه ترحيل قصري الدولة المغربية تقدر تكون قاسية على الشعب حتى تعيا عمرها توصل للمشارقة، لي رحلوا وأبادوا مئات الالاف من مواطينهم، الصراحة هاداك التقياد جا مع جفاف قاحل كان ضرب المنطقة الناس باعت لي وراها ولي قدامها باش توكل نعاجها، بما اننا مجتمع رعوي كسابة وماشي مزارعين، فاش جات هاد الفرصة ديال التقياد مشاو بزاف ديال الناس بوعد مساعدات من الدولة هو لي كنسميوه الرصيون، فيه حك نيدو كبير ولحم الگاموس وباط دالسردين ومواد غذائية خرى، باعوا وشراو فيها الناس ودارو لاباس ولاو ملايرية وشكلوا أصوات انتخابية وتمعشوا من الفساد، والصراحة نفعات البلاد هاديك القضية وهادشي راه غير التسعينات كان هذا موقف الدولة المغربية.

حاليا تبدلات الوقت وراه ناكورني كاراباخ ورجع لبلادو الاصلية بحرب عسكرية واخا دوز قرن منفاصل، المغرب دابا بدل التوجه، وهدرة غالي راها ماشي خيانة للدولة والشعب راه غاهو مادارش تحيين للموقف وصافي، هذا موقفهم من ديما وهذا كان موقف حتى الدولة المغربية في عهد الحسن التاني، وطبعا من حقو يعطي رأيو غاهو ماخاصش هاد حرية التعبير تكون حبيسة القضايا الوطنية، خاصها تمدد وتوصل للصراع في الشرق الأوسط وتوصل لبورما وحربها مع الروهينگا، وتشمل جميع النزاعات في العالم، ماشي بلادنا من حقك تقول انها خاص تقسم ولكن بلادات الناس لا، راه عجيب تلقى واحد حريص على حدود سوريا وهي دولة جديدة عاد تقادات غير البارح أكثر من حرصه على حدود المغرب وهي دولة وامبراطورية سابقة ممتدة لما قبل التاريخ.

إقرأ الخبر من مصدره