المشرفي اللي حول المغربية للالعاب للدفاع على مصالحو. عدد من الاطر هربات والمعمر فهاد المنصب معول على نسيبو يحميه فمنصبو وكيسوق باللي حاطو الماجيدي وما كاينش اللي يطيرو

كود هناء ابو علي ///

يونس المشرفي المدير العام للمغربية للرياضة والالعاب عمر بزاف فمنصبو. هاد المدير اللي جايب “خبير” كياخد لملايين باش يعلمو كيفاش يتكلم بالعربية ويقريه السياسة فانتظار حلمو يتعين شي وزير او شي سفير٬ تعين فعهد وزير الرياضة منصف بلخياط. مازال شاد بلاصتو رغم سنوات طويلة وتغيير كثر من 5 وزراء رياضة.

نسيب عباس الفاسي ونزار البركة مرة حاط رجلو فحزب الاستقلال٬ وكان كيتسنى شي منصب حكومي٬ مرة كيتحدى وزيرو٬ مرة كيولي رقاص لاخر.

ايام الوزير عبيابة. واش عقلو على عبيابة؟ هاداك اللي كان وزير الرياضة وهو من حزب الاتحاد الدستوري٬ كيف قلنا فايام هاداك الوزير كان اتصل ب”كود” وهددها. قال هاد المسؤول باللي غادي يوقف الاشهار ايلى كتبنا مرة اخرى على وزيرو. طبعا ما تسوقناش لتهديدو.

فلقاءاتو فالمطاعم القريبة من مقر “المغربية للرياضة والالعاب”٬ كان كيحلم يكون سفير. قالها اكثر من مرة. مرة مرة كان كيردد باللي هو محمي من منير الماجيدي وهو اللي حطو فهاد المنصب النهار الاول. كيقولها وهو تايق فراسو.

تغول بزاف فالادارة. ولى يعتاقد انو فوق المحاسبة. فوق الوزير الحالي للتربية والتعليم والرياضة برادة.

هاد ليام كثر لقاءاتو٬ كيف ديما باش يتعين شي مسؤول على قطاع الرياضة٬ ولكن مع صحابو اللي كيسوقو كلامو.

خدمتو دعم كل طرف يكون ضد حكومة اخنوش. كيدير المعارضة.

إقرأ الخبر من مصدره