كود هند لكلاوي مراكش ///

ول البارح الاثنين 17 دجنبر 2024 كانت جوج احداث فمراكش. حفل منح الكرة الذهبية فافريقيا ومعاه جوائز اخرى لاحسن حارس ولاعب ولاعبة ومدرب ونادي ومنتخب….٬ كان التوقيع على اتفاقية لإحداث مكتب للاتحاد الدولي لكرة القدم (فيفا) في إفريقيا بالمغرب.

لمغاربة ركزو على الحدث الاول. كانو يتسناو منح الكورة الذهبية لاشرف حكيمي. باش خداها النيجيري لقمان تقلقو وشي خرج من القاعة وشي احتج وهو داخل هاد القاعة بقصر المؤتمرات اللي كان فيها هاد النشاط. بان المغربي عاطفي بزاف. حكيمي يستاحقها وحتى لقمان اللي دار موسم كبير مع ناديه الايطالي اطلنطا. المفروض اللي مدعو لهاد الحفل يتحلى بالروح الرياضية. كان عليهم يبقاو فالقاعة ويقبلو بالنتيجة.

شي وحدين لامو رئيس الجامعة عضو اللجنة التنفيذية ل”الكاف” فوزي لقجع گاع. تاهموه باللي ما دافعش على اللاعب المغربي. هادا قمة العبث. راه الجوائز فالعالم كلها بحال هاكا. خاصك تقبل نتائجها.

لكن فوزي لقجع خرج من ديك النهار رابح وربح بلادو فالحدث الثاني اللي هو التوقيع رسميا على اتفاقية مع “الفيفا” بحضور رئيسها دجاني انفانتينو ورئيس الحكومة عزيز اخنوش لتوقيع اتفاقية تاريخية: إحداث مكتب للاتحاد الدولي لكرة القدم “فيفا” في إفريقيا بالمغرب. هادي خدم فيها فوزي مزيان. المقر كان غادي يكون فجنوب افريقيا. كانت معركة كبيرة بزاف باش المغرب ياخد هاد المقر الاقليمي =خاص افريقيا=

المغرب غادي يوجد هاد المقر ف31 مارس 2025 وكاين فسلا. لمدة 5 سنين٬ كيف جابت “كود”٬ غادي يبقى فالمغرب. هاد المدة قابلة للتمديد. اي ان المقر غادي يكون فالمغرب باش ينظم كأس العالم 2030 وممكن حتى 2035 من بعد يمكن للفيفا تنقلو لشي دولة اخرى وممكن تخليه هنا.

باش تربح جنوب افريقيا بكل قوتها رئيس الكاف منها٬ خاص يكون اسمك فوزي لقجع. هادا لعب كبير واستراتيجي لبلاد كلها. هادا خاصو احتفال بوحدو.

راه هاد المكتب٬ كيف قال رئيس الفيفا ليلة التوقيع٬ “اشادة بالمغرب”. قال باللي التوقيع كيشكل “لحظة تاريخية” وأن “اختيار المغرب لم يأت بمحض الصدفة بل جاء بعد الإنجازات التي حققتها المملكة في السنوات الأخيرة في ميدان كرة القدم” وباللي مكتب الفيفا فإفريقيا “سيمكن من كتابة تاريخ جديد لكرة القدم الإفريقية، لافتا إلى أن الإمكانيات والمؤهلات التي تزخر بها القارة تستحق أن تكتب صفحات مشرقة في مجال كرة القدم”

إقرأ الخبر من مصدره