واش للي خدام فالتواصل مع الاميرة حسنا ما كيحملش الصحافة بالعربية؟ تغطية سنة المغرب فقطر “العربية” حكر على صحافة حتى الصحافيين ما كيعرفوش شي جرائد مشاو مدراءها

كود هناء ابو علي ///

خلال انشطة سنة المغرب فقطر اللي حضراتها الاميرة حسنا القاسم المشترك فيها٬ حضور مدراء صحف ورقية والكترونية اللي كيكتب بالفرنسية. دارت هادي شي شهر فشي نشاط فالدوحة حضراتو الاميرة على الفقطان وتعاودات فشي نشاط هادي يومين على التبوريدة.

دابا ما عندها تفسير الا ان المسؤولين على التواصل مع الاميرة كيكرهو الصحافة بالعربية بحال ايلى هما گور. المثير انهم عرضو على شي وحدين كيقدمو ريوسهم مدراء صحف وحتى الصحافيين فالمغرب ما كيعرفوهمش.

خاصك غير تكون كتكتب بالفرنساوية واخا ما يعرفك حد وها انت معروض للدوحة فالدرجة الاولى لنشاط فيه الاميرة.

النشاط الاخير حضروه شي كمامر ما عندهم علاقة لا بالتبوريدة ولا بالصحافة غير هما كيهدرو بالفرنسية.

دابا هادوك اللي كيديرو التواصل ايلى ما كيعرفو لا عربية لا دارجة لا حسانية لا امازيغية اش كيديرو بيناتنا

إقرأ الخبر من مصدره