كود الرباط//
المحامي عبد الفتاح زهراش، واحد من المحامين الحداثيين فالمغرب، معجبوش التحامل لي تدار على الموكل ديالو الرابو الكراندي طوطو. وقال بلي بأن طوطو مغربي واعتذر للناس لي حسو براسهم تقاسو بكلامو.
وأضاف زهراش لـ”كود” :”كنتمنا ناس لي جاتهم النفس على القانون ويتكلمو بطريقة لي مكتكلمش بها لا النيابة العامة ولا الضابطة القضائية، دبا معطيتش موقف عطيت غير ملاحظة”، موضحا :”النقاش صحي ولكن جزء منو فحال المحاكم الشعبية،”.
وتابع :”طوطو اخلاقيا اعتذر للمجتمع، وعندو دفاع كيوجهو، وهو كيحترم القانون والمؤسسات، مشددا :”داك التحامل لي كيدار على طوطو مرفوض، هو مواطن مغربي”.
وزاد زهراش :”غانكون سعيد جدا على ناس لي جاتهم تجيهم على فضح الفاسدين والمرتشين وناهبي المال العام ولي كيعرقلو الاستثمار ولي كيغتصبو الخادمات”.
وعاد المحامي ليشدد بأن طوطو بين يدي القضاء، يحترم القانون والمؤسسات، مردفا :”لي جاتهم الغيرة على المسؤولية الجنائية خاص تكون عندهم الجرأة يطرح القضايا لي عندها علاقة باغتصاب الخادمات والاتجار بالبشر وفضح ناهبي المال العام والسياسيين الفاسدين”.
وأوضح :”اما طوطو فهو مواطن يخضع للقانون، بتوجيهاتنا مشا عند الامن وبتوجيهاتنا غايمشي عند القضاء، مؤكدا بأن “المغرب يتسع للجميع”.