محمد سقراط-كود///
واحد الوصف كيستعملوه بزاف ديال المعلقين في صفحة گود باش يعايرو كتاب الموقع أصحاب الأفكار الحداثية المتمدنة المناهضة لهرگاوة، وهو وليدات الليوطي وليدات فرنسا، والصراحة انا مثلا مكنشوف حتى شي عيب في هاد الهدرة، راه شرف كبير لأي انسان فوق الكرة الأرضية يكون ولد الليوطي وحامل لأفكاره وثقافته ومبادئه او يكون ولد فرنسا لي عطات للعالم أغلب المفاهيم ديال الحرية والثورة ومحاربة الظلم والاستبداد والاضطهاد، والتمرد على السلطة الظالمة الغاشمة المعذبة، فرنسا الأنوار والحضارة والمفكرين والفلاسفة الكبار، فرنسا نابليون لي البشرية مدينة ليه بالعديد من القرارات الثورية لي خدا ودار وغير بيها مجرى التاريخ.
واش عرفتوا شحال صعيبة تكون ولد فرنسا، لأن فرنسا ماشي غير رقعة جغرافية او جيش استعماري سابق، فرنسا راه ثقافة ونمط عيش ومبادئ وأفكار ونظرة للحياة، واش عرفتي شحال صعيبة تكون ولد فرنسا في المغرب وبشحال كتقام بعدا، وفين خاص تقرى والنقط لي خاص تجيب، هاعلاش من يوصفون بوليدات فرنسا كتلقاهم مخرجين غي من المدارس الكبرى وغير في المناصب الكبرى، واخا راه المغرب عانى منهم بحالهم بحال وليدات الشعب، راه عشرات السنين من تسيير وليدات فرنسا وخريجي المدارس الفرنسية العليا النتائج كانت بحال فاش شدو الحكومة صحاب التعليم، غاهو القاريين بزاف فسادهم كبير وارقامهم مهولة عكس لي قاريين غير شوية كتلقاهم غير هواة قدام اللولين.
كنفضل نكون ولد فرنسا على نكون ولد السعودية والمدارس الدينية ديالها لي كانوا كيمشيو يقراو فيها بعض المغاربة المغرر بهم، وكيرجعوا دايرين فيها راه كانوا معاشرين مع الصحابة تم وجابوا الدين من المنبع، علما ان السعودية تحررات من داكشي ودخلات كاع الفقها لي فيهم الفريع للحبس وطلقات الشباب يعيش ويبدع وحنا وحلنا مع خدم الكفيل، أو أي بلاد أخرى متشبعين بعض المغاربة بثقافتها، هانية تكون ولد تركيا تكون ولد أفغانستان ولد مصر ولد سوريا ولد روسيا ولد الاتحاد السوفياتي، فرنسا بوحدها لي عيب زعمة علما ان فرنسا بوحدها في هادو كاملين لي حاملة لقيم الإنسانية وصدرتها للعالم بطريقة او بأخرى.