كود سبور//
كايتسناو المغاربة ماتش المنتخب المغربي اللي مشارك فمسابقة kings league اللي منظمها فالطاليان، جيرارد بيكي النجم السابق للبارسا.
وغايلعب المنتخب المغربي اللي الرئيس ديالو هو الستريمر إلياس المالكي، (غايلعب) ماتش حاسم ضد منتخب الجابون اليوم الاثنين مع 6 ديال العشية بتوقيت المغرب، بمدينة ميلانو الإيطالية، وهي آخر فرصة له باش يتأهل إلى ربع نهائي مسابقة kings league، بعدما خسرو أول ماتش مع كولومبيا وقدرو انهم يتداركوا الموقف فالماتش الثاني برباح على أوكرانيا.
ومكون المنتخب المغربي المشارك فـ kings league من لاعبين سابقين بحال زكرياء حدراف وعصام الراقي، وشي وحدين معروفين على مواقع التواصل الإجتماعي بحال سعيد العاوني المعروف بـ “لولا الظروف”، وكايدربهم مدرب الگول مجيد الخال، وكاتعرف مباريات المغرب فالمسابقة متابعة مهمة من الجمهور المغربي.