وكالات//
الممثل الميريكاني ماثيو بيري المعروف بلقب تشاندلر بينغ ولي تشهر في مسلسل Friends ، شارك لأول مرة المعاناة ديالو مع إدمان الشراب والحبوب المخدرة لمدة سنوات طويلة وكيفاش قدر يتجاوز المرحلة.
تشاندلر بينغ قال إنه خسر 9 ملايين دولار على راسو باش يقدر يتعالج من الإدمان ويبقى ساحي، لأنه سنوات ما حسش براسو عاقل وفي الوعي ديالو، ديما الشراب مدوخو طيلة مسيرتو الفنية.
وقال الممثل الميريكاني في مقابلة مع نيويورك تايم أنه بدا الشراب في عمر 14 عام وشحال من مرة كانو كيهزوه للسبيطار بسبب الكمية لكبيرة لي كيشرب، وكان كيرجع ليه، حتى عام 2021 فين قرر يتعالج من الإدمان.
وقال إنه تعالج قبل ما يبدا التصوير ديال فيلم Friends Reunion ولي جا من بعد 17 عام على النجاح لكبير لي حققو مسلسل Friends، وكيفاش اللقاءات ديالو مع صحابو من بعد هاد المدة في العمل الجديد عاوناتو باش يدير الخطوة.
وفي نفس المقابلة اعتبر بينغ أن الإدمان ضيع عليه بزاف الفرص ديال النجاح، لأنه كان في أوج العطاء ديالو قبل سنوات، ولكن أغلب ساعات نهار كان كيدوزها يا شاد القرعة يا كياكل الفانيد فوق الفوطوي.
واعتبر بينغ أن الممثلة جينيفر أنيستون لي تشهرات بشخصية رايتشل غرين في مسلسل Friends كانت أكثر واحدة قريبة ليه في الوقت لي كانو كيصورو الفيلم قبل 17 عام، وهي الوحيدة لي واجهاتو وقالت ليه أنت مدمن خاصك تتعالج.