كود هناء ابو علي ////
دابا هاد هايلالا اللي منوضينها مالين اللحايا و ها اللي يغوت ويك ويك بغاو يدمرو الأسرة و ها اللي طالقها فتيكتوك و فيسبوك بالمعيار فلعيالات والسبان فوهبي ولمقارعة دالحمامات…
وها اللي يقول زمن الانحلال و ها اللي يجدب ويك ويك إن هذا لمنكر كيفاش الراجل يخلص ليصانة وخا تزوجات طليقتو بواحد آخر و نجيو نجاوبوه ياودي راه كينفق غير على ولادو و اللي راجل ديال بصح راه ماخصوش يتسنى أصلا راجل آخر يصرف ليه على ولادو، فاينوضو لخرين ويك ويك كيشجعو على العزوف على الزواج ويك ويك إنه إنهيار المنظومة..
نجيو نجاوبوهم يا ودي راه العزوف عندو عوامل أخرى مرتبطة بالأساس بما هو مادي و غلاء المعيشة و الأسعار ووو…ويجيو لينا رباعة خرين من الجنب فيها اللي يدوي على القيم الإسلامية و القرآن و الدين الحلال و الحرام و هو حتى القبلة محال عارفها فين جات و ها البكاء و ها النحيب وها الجنازة من باب شالة حتى لباب الحد و هاد الشي كااامل وملي تجي تتمحص وتقلب وتتمعن في حقيقة الأمور كتلقى الميت ماشي حتى فار!! الميت صرصاااار.
دابا حنا اللي سنين هادي و حنا كناضلو و كنرافعو من أجل المساواة و فرحنا ملي سيدنا طالب بالمراجعة و قلنا و أخيرا جاء الفرج وجلنا كنتسناو سي التوفيق و رباعتو يجتاهدو و يلقاو لينا شي تخريجة و يديرو المناصفة في الإرث أو أضعف الإيمان إزالة التعصيب اللي ما عندوش سند صريح في القرآن، كنتسناو يتنصفو أطفالنا و الرمزية الكبيرة ديال القطيعة مع الممارسة القبيحة ديال زواج القاصرات، ست شهور و مجلس العلمي ديالنا كيحضر فأعمال اللجنة وقلنا صافي غادي يجتهدو و يعتامدو البصمة الجينية بحالنا بحال الدول اللي كتحترم العلم و التقدم التكنولوجي و ينقذو أطفالنا من التشرد ومن الحياة فالشوارع(واش مكيضرهمش خاطرهم بحالنا ملي كيشوفو لبراهش كيدورو فالزنقة بلا واليدين كيسعاو؟ أو لا هما من كثرة الإيمان معتاكفين فالمكاتب ولا فالديور مكيخرجوش يشوفو واقع الشارع المغربي بسبب الرجال اللي كيتنصلو من مسؤولية الحمل؟؟؟؟)
فرحنا وهللنا وجلسنا نترقبو يخرجو لينا عظماء فقه البلاد و على الأقل يديرو شي فتوى و لا جوج، راه دار الإفتاء في مصر في السنة اللي فاتت خرجات خمسة ديال الإجتهادات و الفتاوى لإلغاء زواج القاصرات في قانون الأحوال الشخصية و تجريمه في القانون الجنائي المصري، وفي الأخير: رجع بخفي حنين!!!
تمخض الفيل فأنجب قملة!!!
إوا تعالو نشفو بعجالة(جاي واحد المقال تفصيلي فالموضوع) أشنو كاع واقع فهاد المقترحات ديال مشروع مدونة الأسرة يا حسرة: أهم النقاط اللي كتنظمها مدونة الأسرة:
1. الزواج: تحديد سن الزواج للذكور والإناث في 18، لم يتغير شيء كبير لأن السن المحدد 18 في المدونة الحالية، و زواج القاصر راه باقي لأن الاستثناء يبقى في 17 سنة. تنظيم حقوق وواجبات الزوجين: لا تغيير يذكر إجراءات توثيق عقود الزواج: توثيق الخطبة باش ما يبقاو الدراري يديرو داكشي ديال ” دق دق جيتكم طالب راغب و يمشي يغرر بالدرية ويحملها و ملي يجيو تندو لإثبات النسب يقول لا ما كنتش خاطبها ما كنعرفها كاع. و هذ الإجراء راه أضعف الإيمان بما أن المجلس العلمي رفض الخبرة الجينية لإثبات النسب.
2. الطلاق: تقنين أنواع الطلاق، مثل الطلاق الاتفاقي، والطلاق للضرر، والتطليق للشقاق: عادي هادشي و قديم و لا تغيير يستحق الذكر حماية حقوق المرأة والأطفال عند الطلاق، بما في ذلك النفقة والحضانة: تثمين العمل المنزلي و تنظيم بيت الزوجية هو الطارئ الوحيد الذي يستحق الذكر و هذا راه مافيه لا حلال لا حرام و مديور على أساس انتوما مالين الخير و أهل الجود و الكرم و أهل “كرم الله المرأة” و أهل “ما بين الخييرين حساب” و و و الشعارات الإسلاموية الرنانة اللي كتخرجو لينا ديما باش تصفو راسكم مقارنة مع الغرب.
3. الحضانة والنفقة: تحديد قواعد الحضانة عند انفصال الزوجين، مع مراعاة مصلحة الطفل: و هنا راه غير مصلحة أولادكم أ لباشاااار. تنظيم النفقة لضمان معيشة الأطفال والمرأة بعد الطلاق: مصلحة أولادكم أ البشاااار
4. الميراث: الحفاظ على قواعد الإرث المستمدة من الشريعة الإسلامية: قاعدة للذكر مثل حظ الأنثيين باقية و قاعدة يجي ولد عم جد بات خال عمك يا البنت يورث معاك النص حيث ماعندكش خوك باقية.
منظومة الإرث الجائرة ديالكم باقية كيفما هي تطليوها!!! إذن هاد الروينة كاملها اللي منوضينها لبانضية ‘عفوا لخوانجية’ ما عندها إلا تفسير واحد : يا الركوب السياسي مرة أخرى على الأحداث و كيوجدو لإنتخابات 2026؟ يا دايرين سياسية : صبعي تما وهادشي ما يدوزش غير عكس وزكارة!!!
إوا حتى حنا غادي نديرو سياسة ما مفاكينش : هادشي غادي يدوز بغيتو ولا كرهتو، على الأقل قرصة فالفكرون كل عشرين عام ولا يمشي ناجم.