محمد سقراط-كود///
واش فرنسا بوحدها لي قتلات جدود المغاربة؟ هاد السؤال بقا كيطنطن ليا في راسي من بعد ماشفت التعاليق على المقال السابق لي كتبت على الجنرال الليوطي وكيفاش المغاربة مدينين ليه بالمغرب الحديث، وبداو بزاف كيقولوا كتمجد فرنسا وهي قتلات جدودك، في حالتي الشخصية أنا فرنسا ماقتلات ليا حتى شي جد، بل العكس جدي كان كيقتل في الفوضويين الإسبان لأنه حارب مع الجنرال فرانكو واش مشا بخاطرو أو بزز هادي حاجة خرى المهم أنه مشا شاف العالم ورجع كيلبس مزيان ومتحضر وقرى ولادو وبناتو ولي هي كانت حاجة قليلة داك الوقت خصوصا البنات، بينما جدي لاخر ديال با كان كيسرح وكيتنقل بين الرحامنة وبوشان والكنتور موحال أصلا وشاف الإستعمار، الحاجة لي وصلاتو من الإستعمار هو واحد البير حفراتو فرنسا للعمال ديال السكة لي كانت دايزة لمراكش، وبقا داك البير كيستافدو منو الناس حتى لهاد الأواخر نشف، ومعركة سيدي بوعثمان هاديك بالظبط وقعات حدا دار جدي بدراع الزيتون بالظبط وكانت عبارة على عملية إنتحارية بأوامر من الهبة ماء العينين يقودها مربيه ربو، مشاو جمعوا المغاربة من كل حدب وصوب وداوهم لاقاوهم مع مدافع وأسلحة الفرنسيين يموتوا تم ورجعوا بحالهم.
وفاش كتسمع هاد الهدرة أصلا كيجيب ليك الله راه المغاربة كانوا عايشين في سلام و وئام حتى جات فرنسا قتلات جدودنا واستعمرتنا، راه حنا براسنا كأمة كنا إستعماريين طيلة تاريخنا، إستعمرنا هاديك أوروبا نيت ووصلنا حتى لجنوب فرنسا، والمغاربة نيت فاش مكانوش كيقدروا على الأوروبيين كانوا كيتوغلوا في أفريقيا جنوب الصحراء بدعوى نشر الدين، وكيجيبو نص سكانها عبيد يبيعهم لأوروبا نيت، بل أن فرنسا كانت من بين أسباب إلغاء العبودية في المغرب، راه في وقت الإستعمار، كانوا المغاربة مولفين يختاطفوا بعضياتهم ويبيعوا الناس في أسواق العبيد المعروفة في مراكش وفاس ومدن أخرى، راه كانت البنت غير الى خرجات للعين تسقي تلقى راسها كتباع في سوق الغزل بمراكش، المغرب راه عبر تاريخه كان بلد إستعماري، وكان ديما كيوسع الحدود ديالو لأقصى مايقدر عليه، حنا راه ماشي ترادفونا من إستعمار لآخر.
حنا من ديما كنا أمة إستعمارية في لحظة ضعف وبسباب عوامل كثيرة خضعنا للإستعمار الأوروبي لي ساد العالم، علاش هاد البكى والشكا والكره ديال الآخر، هوما ستعمرونا خمسين عام حنا ستعمرناهم تمنية دالقرون وماداروش هاد الحالة، يبدو أن المغاربة عاداوهم الجزائريين لي دايرين حملات في الويب بالبكى والشكى من فرنسا ومذابحها، راه حنا ماشي بحالهم ومادوزوش علينا داكشي لي دوزو عليهم وعمرهم كانوا دولة وإمبراطورية بحال لي كنا، راه ماشي نفس السياق حنا دولة وأمة عندها تاريخ وكانت عظيمة ضعافت في لحظة ما من التاريخ وتعرضات للإستعمار ، ماشي تقادفونا من هاد الإستعمار للاخور، وفرنسا حاليا حليف وجزء من تاريخ المغرب بحال كيما المغرب جزء من تاريخ الجزيرة الإيبيرية وشمال افريقيا كاملا، هاديك لغة البكاية ديال فرنسا راه قتلوا جدودك ونتا فرحان بيهم مالايقاش بينا، جدودنا راه مخلاو ماقتلوا منذ ألاف السنين راه يالله حبسوا واحد الميتين عام هادي.