كود سبور//
غادي يتحرم فريق مولودية وجدة من لعاب مهم فالصفوف ديالو فالماتش الجاي ضد الوداد الرياضي السبت المقبل فوجدة، ضمن الجولة 7 من منافسات البطولة الإحترافية لكرة القدم.
وكيتعلق الأمر بلعاب وسط الميدان فمولودية وجدة ياسين الفيلالي، اللي تهرس فالمشط ديال رجليه حسب ما كشفت الفحوصات الطبية الأمر اللي غادي يخليه يغيب على الفريق الوجدي باش يتعالج ويرتاح لمدة 6 السمانات.
وكيدوز مولودية وجدة من مرحلة صعيبة بزاف حيث متوترة العلاقة ما بين إدارة النادي وجمهورو اللي كيقاطع ليماتش ديال الفرقة، إضافة إلى مقاطعة اللعابا للتداريب حيث كيطالبو بمستحقاتهم، الأمر اللي كايخلي الماتش ضد الوداد السبت الجاي، صعيب على المولودية خصوصا وأن الحمرا كتصدر البطولة وكدوز من مرحلة زوينة من بعدما ربحات الديربي الأحد اللي فات.