محمد سقراط-كود///
نفس الناس لي كانوا مع المقاطعة هوما لي مع إعتقال النجم طوطو هو لي كيسبوا موقع كود الطاهر هوما لي كيصوتوا على العدالة والتنمية ويحضروا مسيرة ولد زروال في نفس الوقت، هوما لي فاش كيتحرش شي مكبوت بمرأة مغربية حرة كيقولوا هي لي خارجة لابسة هكاك، هوما متتبعي المهداوي قبل مايقتانع أنه يوتوبر وهوما لي كيسميوه باع الماتش دابا، هوما لي ضد لقاح كورونا، هوما لي فرحوا للهجوم على سلمان رشدي وهوما لي ترحموا على القرضاوي، وهوما لي فاش كيتشد شي شفار ديال القوادس ولا البزاطم كيقوليك كتشدوا غير الشفارة ولاد الشعب وكتخليو الشقفارة الكبار، هوما لي كانوا ضد موازين وضد تي جي في وضد أي مشروع كبير كيديرو المغرب وكيسميوه العكر فوق الخنونة، ووطبعا هوما لي مخرجوش في عشرين فبراير وأخلفوا موعدا مع التاريخ.
نوع دالبشر مغبون وباغي يغبن معاه العالم، كتلقاه غير كيبكي ويشكي من إيامات التعليقات فهيسبريس وهو ماعاجبوا حال، سنين دازو والناس وكبرو وتزوجو وولدوا وشابوا وقراعوا ومع ذلك الحياة مبدلات فيه والو، المغرب تبدل حداه ولكن هو باقي كيشوفوا بنظرة قديمة، طبعا المغرب ماولاش جنة ولكن راه تقدم بزاف مقارنة بشحال هادي وغادي مخير وفي البلاصة فين كاينين راه حنا دولة لي مشات مزيان والطريق التسرحات من طنجة للكركارات، آه باقي مشاكل كبيرة ديال الفساد والظلم الضريبي ولكن عموما راه حنا بعاد نوعا ما على الدولة لي كناها في بداية الألفينات، وهادشي راه باين وواضح.
حاليا كاين صراع وهوة عميقة بين حجيلين في المغرب، هاد الجيل الجديد كبر في الأنترنيت والحرية والإبداع والتنوع وسهولة الوصول للموضة والمعلومة والمعرفة، كبر في المولات ومحلات الماركات العالمية عوض الجيل لي قبل منو لي كبر في قناة وحدة أما حتى دوزام كانت مشفرة وغير عند كيليميني والمفرنسين، وكبر في الجوطيات والسويقات والقيساريات والمحدودية وإنعدام التنوع والإبداع حتى في اللباس، نهار العيد كتلقى المغرب كامل لابس نفس التريكو والسروال والسباط، المغرب كامل كيتفرج نفس المسلسل نفس الرسوم نفس البرامج لا تغيير قمة التنميط، ولي كابر بهاد العقلية هو لي كيحارب دابا هاد الجيل لي كيمثلوا طوطو ولي كبر في التنوع والإختلاف والوفرة ، سبعلاف قناة وموقع وفيلم وموسيقى وبلاتفورم وملايين المحتويات وكل واحد شنو تابع وشنو كيعجبوا وتاواحد مكيشبه لواحد آخر وكولشي عاجبوا هاد الإختلاف وكيعيشوه هذا هو سباب فرح العديد لإعتقال أول رابور مغربي عالمي.