أنس العمري-كود///
قبل قليل من بعد ظهر اليوم الأربعاء، سدات السلطات المحلية محل “بلبن” لي ولا خالق مشكلة أمنية كبيرة في المعاريف بالدار البيضاء، حيث ولا شارع القاضي إلياس عصيب تدوز منو بسبب الأعداد الكبيرة لي كتقاطر كل لحظة لاقتناء منتوجات هاد الماركة المصرية.
وجندت لعدم تكرر مشاهد الفوضى والروينة فالشارع هاد المرة عدد أكثر من القوات، لي من ضمنهم رجال السلطة والبوليس والقوات المساعدة.
وعاينت “كود” ثلاثة ديال الصطافيطات واقفين بالقرب من المحل، وحدة ديال البوليس وجوج ديال القوات المساعدة لي مستنفرين لوضع حد لحالة الفوضى لي هادي أيام كيشهدها الشارع.
ورغم أنه مهبط الريدو، رصدت “كود” عدد من الأشخاص واقفين كيتساينو لاحتمال يعاود يستأنف “بلبن” نشاطو، وهو ما يطرح علامات استفهام كبيرة حول سر تعطش مغاربة لتذوق منتجات هاد الماركة المصرية.