كود احمد الطيب الرباط ///
علمت “كود” ان الحكومة وافقات على اقتراح من فرق الاغلبية فمجلس النواب باش تدخل بخيط ابيض بين الحكومة المحامين.
وحسب مصادر ل”كود” فان مجلس النواب دعا لاجتماع بين الطرفين الاثنين الجاي.
هاد التطور الجديد جا بعد بيان هيئات المحامين بالمغرب عما سماه برنامج نضالي يبدا بالتوقف عن العمل الثلاث الجاي بكاع المحاكم مع وقفات احتجاجية.
المكتب حمل وزير العدل مسؤولية الازمات الحاصلة ورفضو المستجدات الواردة فمشروع قانون المالية المتعلقة بتأسيس واستخلاص الضرائب من المحامين والشركات المدنية المهنية للمحاماة واعتبروها كتعارض مع المبادئ المؤطرة لمهنة المحاماة والمقتضيات الدستورية
دابا ما عرفناش واش هيئة المحامين بالمغرب غادية تقبل هاد الوساطة ديال البرلمان ولا اللا. رفضها غادي يعني رفض اداء ضرائب للدولة وغادي يكون نوع من الانتحار لهاد الهيئة
وكانت البرلمانية عن حزب التراكتور فالاغلبية نجوى كوكوس اللي هي محامية٬ قد اثارت الموضوع فمداخلة ليها فلجنة المالية.
البرلمانية هدرات على ضرورة التنسيق والمشاورات مع المهنيين ودعت الى مبادرة تشاركية مذكرة برسائل بعثها فوقت سابق محمد السادس الي مؤتمرات خاصة بالمحامين وتتناول سمو وقدسية هاد المهنة.