سهام البارودي- كود//
واش لهاد الدرجة المغرب كدولة زعما عاگر ؟ ماقادرينش حنايا نديرو عمل ابداعي خاص بكأس افريقيا ؟ و الله الى أسئلة كثيرة من ديما كنت كانطرحها على راسي، من يامات كنت كانقرى و كانقارن الاشهارات المصرية مع الاشهارات المغربية لي كلها عامرة غي دقايقية و شطيح و موسيقى و يا ديليسيا يا المرضية احسن ما فماطيشة راك ديتيه نتيا. من ديما كنت كانسول راسي واش عندها فقر فالابداع و علاش عندنا فقر فالابداع ؟ واش المشكل نفسي عند المغربي و لا المناخ السياسي و لا الجينات ؟ ماعرفتش الصراحة.
واش عندنا فقر فالابداع ؟
اه
غالبا اه
حيت الاغلبية متعايشين معاه و كايعجبهم.
دابا المشكل هوا انه فتظاهرة كبيرة فحال كأس افريقيا راه زعما گاع الظروف متوفرة للابداع واخا مايكون عندك قادر تكوّنو، الفلوس موجودين، و حتى الطاقات لاماكانتش فالمغرب راه كاينة خارج المغرب، و الافكار حدث و لا حرج، الدول لي عارفة عندها فقر فالابداع كاتحرك الفلوس و كاتجيب احسن اختصاصيين فهاد النوع ديال التظاهرات باش ينظموهم ليها.
الكورال ديال ريدوان كانت تكون صالحة كون فشي گالا Gala خيرية لجمع التبرعات للمرضى و لكن فتظاهرة رياضية كبيرة فحال هادي راه سبّة فحق المغاربة، اولا اللحن ديال الاغنية موخود من اغنية كريمينال ديال بريتني سبيرز، الكلمات عيانة يقدرو الدراري ديال دار الشباب يكتبو احسن منها و الكورال غير متناسق، لا لباس مگاد، لا مظهر مگاد، لا أغنية حافظينها… و ريدوان راه فايت خدم فالسوبر بوول فميريكان و جاي من بلاد الابداع و التظاهرات علاش كايوصل تال عندنا و كايشد فيه الوجه ديال شي مؤطر ديال مخيم ديال الكشفية فإفران و كايولي باغي يخرج لينا أغاني يصلاحو تجيب بيهم النعاس مع وليدات المخيم فشهر ثمنية ؟