الغريب من القول الدخيل على الثقافة المغربية التليدة التي عشنا ونعيش فيها.. مفردات دينية اجتاحت دارجة وعربية الفايسبوكيين: “طهور يا اخي.. ” و “جمعة مباركة” حتى كايحساب ان نهار الجمعة نهار مقدس بحال السبت عند اليهود ولا الحد عند النصارى

عبد اللطيف اگنوش استاذ باحث ///

مفردات دينية اجتاحت دارجة وعربية الفايسبوكيين…
إلى حدود اعتناقي للطريقة الفايسبوكية، بعد سنة 2018، لاحظت كلمات تنتمي للحقل الديني ومكتوبة ومنطوقة على الطريقة المشرقية تغزو المغاربة غزواً….
الصراحة على مدار ثلاثة وسبعين عام ما عمرني سمعت شي مغربي گال لصاحبو مريض: “طهور يا اخي…”.

وكلمات اخرى كا طّيّح الكرش على المغربي القح، الله يستر…وسواء كان رجعي او تقدمي او علماني أو مثقف عادي يعني مغربي وصافي ، ولكن من مواليد الثمانينات حتى هو ماكاين غا طاهور وشي كلام كنت نسمعهم غا عند المشارقة…ونهار الجمعة ماكاين غا “جمعة مباركة” والكلام للي ما عمرني سمعتو وما عمرني فهمتو…لدرجة كايبان ليك بنادم كايحساب ان نهار الجمعة نهار مقدس بحال السبت عند اليهود ولا الحد عند النصارى…الله يستر وصافي…

واش هاذ الشي كْثر ملّي صْبح الذهاب للحج ساهل لأنّ ثمن السفر بالطيارة اصبح رخيص وفي متناول الحازقين وحتى الطبقات الوسطى للي تعادات من المشارقة؟ او بقراءة ابن تيمية الله يتبّعو البلا؟ ولا تأثير صحاب مول التقاعد؟ اللاوعلم نعاماسسسس.

كنت كانعرف غا “على سلامتك اخويا…مايكون عندك باس…الله يگعّد وسادك”، وللي عرفناه سالا صافي، كانگولو ليه “الله يشد بيدّيه مسكين، راه گْضى وصافي…” زعما راه غادي يعگدهم والسلام….
واش هو تأثير الخوانزية على المغاربة؟
واش المغربي ولى نْزقْ كايقلد المشارقة لان الثقافة ديالو حزْقات ليه؟
ما عرفت وللي عرف يثقّفني ويقريني فاني له من الشاكرين….

إقرأ الخبر من مصدره