محمد سقراط-كود///
في القرن 19 لي كانت فرنسا مستعمرة الجزائر وعدة مناطق أخرى في العالم، ومع ذلك كانت كتحارب مع دول أوروبية أخرى وكيستعمروها مؤقتا بحال لي وقع مع بروسيا راه دخلوا لباريس واعلنوا قيام الدولة الألمانية من وسط العاصمة الفرنسية، ومع ذلك كانت بقات فرنسا دولة عظمى استعمارية، ومن بعد ناضت من جديد وحاربات في الحرب العالمية الأولى وغلبات، وفي داك الوقت جيوشها بدات تدخل للمغرب وفي الحرب العالمية التاتية كانت مستعمرة نص المغرب، واخا هي براسها دخل ليها هتلر استعمرها بمستعمراتها، ومع ذلك قاومات وغلبات وبقات دولة عظمى، استعمرات نص العالم وحتى هي استعمروها ومكاينش الموشكيل من ورا أي خسارة عسكرية كانت كتنوض من جديد.
حنا المغرب طول تاريخو دولة إستعمارية توسعية وقعات لينا كبوة في فترة من الزمن فين سيطروا الفقهاء على دهاليز الحكم وولات عندهم كلمة قوية في تسيير البلاد، وبداو كيعارضو كل ماهو جديد ومتطور وخصوصا الى كان جاي من عند النصارة لانهم كفار لا يأتي من عندهم خير، وفي داك الوقت اورربا طارت في الثورة الفكرية والصناعية وعاشت عصر الانوار وحنا غاديين كنحفرو في القاع ديال عصر الظلمات، ولعدة أسباب أخرى لقينا راسنا دولة ضعيفة متخلفة مريضة كتعاني وتم استعمارنا من طرف أوروبا ولفترة وجيزة، ومع ذاك عندنا مجموعة من المثقفين البكاية لي ديما دايرين وجه الكلب الحزين باغين يلخصوا تاريخ المغرب في انه مان مستعمرة فرنسية وراه باقي كيتغبن ويتألم من هاد الاستعمار.
حتى فاش كتجبد الهضرة على فظائع أوروبا الإستعمارية، كينوضوا هاد النوع ويصنفونا في خانة الضحايا مباشرة، علما اننا تاريخيا في خانة الجناة الكبار، المغرب براسو فاش كانت كتأزم عندو الدعوة كيهبط يهجم على ممالك السودان ينهب ثرواتهم ويستعبدهم بدعوى نشر الإسلام، راه وحدة من أعظم الإميراطوريات لي تأسسات في افريقيا مملكة سونغاي راه احمد المنصور الذهبي لي انهى الحكم ديالها ومسحها من الخريطة، من غير هادشي راه المغرب هو اكثر دولة استعمارية عظمى دازت في هاد القنت فين مكان كيتقوى كيحوز گاع داكشي لي حداه، هذا حتى هو تاريخنا وخاصنا نفتاخرو بيه علاش مصرين تبينو المغرب بحال شي ضحية ديال الاغتصاب مازالت تعاني من هول الصدمة، المغرب كان الصحيح ديال هاد القنت وداز وقتوا بحال لي داز وقت الرومان والاغريق والفينيقيين وكاع الامبراطوريات العظيمة، الطاليان ليومنا هذا بالنسبة للعالم هي الامبراطورية الرومانية وماشي مجموعة من الدويلات دخل عليهم نابليون غلبهم فيوماين وكتبهم في سمية خوه، راه هكاك حتى حنا عندنا تاريخ كبير وطويل هاديك خمسين عام دالحماية او الاستعمار متعطيكش حتى جزء من الثانية منو.