كود سبور//
غايرجعو ماتشات البطولة يتلعبو ابتداء من الويكاند الجاي، بعدما توقفو لفسح المجال لإجراء الماتشات المؤجلين للاندية المشاركة فالمسابقات الافريقية، ومازال مستمرة معاناة كل من الفتح الرياضي وحسنية اكادير في البحث عن ملعب لاستقبال المباريات ديالهم، حيث تيران مولاي الحسن بالرباط وتيران ادرار بأكادير كايتصلحو.
وحددت العصبة الوطنية لكرة القدم الاحترافية، مواعيد ماتشات الجولتين 20 و 21 من البطولة الاحترافية، وقررت تلعب الجولة 20 بين الجمعة 7 فبراير 2025 و الاحد 9 فبراير 2025.
ومن ابرز ماتشات الجولة 20، قمة الماص والكوديم يوم السبت 8 فبراير مع 4 العشية فتيران الحسن الثاني بفاس، وماتش الجيش الملكي ضد اتحاد طنجة بملعب القنيطرة بنفس اليوم مع 6 العشية.
وكاين ايضا ماتش نهضة الزمامرة ضد الرجاء الرياضي بملعب احمد شكري بالزمامرك يوم الاحد 9 فبراير مع 6 العشية، وبنفس اليوم الفتح الرياضي لاعب ضد نهضة بركان مع 6 العشية ومازال كايقلبو على تيران باش يستقبلوهم فيه، وكان ماتش الوداد الرياضي ضد حسنية أكادير مع 8 الليل بنفس اليوم فتيران العربي الزاولي.
أما بخصوص الجولة 21، غاتلعب بين 14 و 16 فبراير 2025، ومن أبرز الماتشات ديالها، ماتش حسنية اكادير ضد المغرب التطواني يوم الجمعة 14 فبراير 6 العشية، والحسنية مازال كايقلبو على تيران لهذا الماتش، وكاين ديربي الرباط بين الفتح الرياضي والجيش الملكي يوم السبت 15 فبراير مع 6 العشية ومازال الفتح كايقلبو على تيران يستقبلو فيه ليفار، وبنفس اليوم مدخلين الرجاء الرياضي شباب السوالم بالعربي الزوالي مع 8 الليل.
وكاين ماتش الدفاع الحسني الجديد ضد المغرب الفاسي عن نفس الدورة، يوم الاحد 16 فبراير مع 4 العشية فتيران العبدي بالجديدة، وشباب المحمدية مدخلين الوداد الرياضي بنفس اليوم مع 6 العشية فتيران البشير، والمتصدرين نهضة بركان لاعبين ضد المطاردين ديالهم نهضة الزمامرة بنفس الدورة واليوم فتيران بركان مع 8 الليل.