سهام البارودي كود ////
واحد الفيديو متداول ديال رئيس الحكومة سي عزيز أخنوش كايقول فيه بلي المغربي لي عايش برّا دابا قادر يجي لبلادو كل شهر بستمية درهم.
كمغربية عايشة برّا و كانجي للمغرب بزاف ديال المرّات فالعام نقدر نقول بلي الهضرة ديال السيد رئيس الحكومة عندو فيها الحق، ايه كاينين لي بيي بستين اورو للمغرب و ايه حنا كمغاربة مقارنة مع بزاف ديال الجاليات الشمال افريقيا و الافريقية و الآسوية عندنا الزهر حيت المغرب فيه بزاف ديال شركات الطيران لي كاتوفر ليك مقاعد بمختلف درجات الراحة و الاثمنة و هادي حاجة مزيان و من قبل ماتجي حكومة أخنوش و هاد المسألة كاينة ( من نهار ولا اللوكوست فالمغرب)
و لكن مسألة ستمية درهم راه كاتبقى بشروط و شروط معقدة بزاف، خاصك أولا تكون خارج لاهوت سيزون (فترة الذروة) يعني ماشي فالصيف و ماشي فراس العام و ماشي ففترة الاحتفالات و ماشي فنويل ، و خاصك تكون ماعندك لاخدمة لا ردمة باش تمشي للمطار شي نهار الثلات مع الثلاتة د الصباح باش تشد الطيارة ديال ستمية درهم اما باش تلقاها الويكاند البعابع لالقيتيها ! و خاصك تسافر بلا حوايج غا بصاكادو فيه گرصون وشيتة د السنان مهرسة وتقشيرة وحدة …
طبعا كاينين ناس قادرين يديرو هادشي و كايستافدو من هاد الاثمنة و لكن الاغلبية ديال المهاجرين المغاربة فاش كايبغيو يسافرو راه كايخلصو البيي مثلا باريس- الدار البيضاء على الاقل بواحد الفين و خمسمية- ثلتالاف درهم للشخص و ماشي ففترة الذروة.
لذلك فحال هاد الهضرة كاتبقى تسويقية و الهدف منها الماركوتينگ اكثر من انها تنقل الواقع بشكل محايد.