كود سبور//
يعيش الدولي المغربي أمين حارث مرحلة صعبة مع أولمبيك مارسليا الفرنسي، واللاعب اصبح خارج حسابات الفريق، وباغيين يشوفو كيفاش يصيفطوه لشي فريق آخر، وكشفت وسائل إعلام فرنسية أن أمين حارث ولى خارج حسابات مدرب أولمبيك مارسيليا، الإيطالي روبرتو دي زيربي، واللي ما عاجبوش الحال بسبب الإصابات المتكررة للاعب المغربي، وأن حارث خاصو يقلب على فريق جديد فهاد الميركاتو الشتوي قبل ما يسد، وأولمبيك مارسليا كايقلبو لمن يبيعو العقد ديالو واخا حالتو البدنية ما كاتعاونش.
وحسب جريدة “ليكيب” الفرنسية، فإصابة أمين حارث معقدة الأمور بالنسبة لأولمبيك مارسيليا الفرنسي، حيث باغيين يبيعو العقد ديالو ولكن ما قدروش حتى لدابا بسبب الإصابة الأخيرة اللي جاتو قبل أسابيع، وحتى الأندية اللي كانوا مهتمين به قلبو، وأولمبيك مارسليا ما لقاوش حل لهذا الملف قبل ساعات قليلة من نهاية هذا الميركاتو الشتوي، وأن حتى العروض اللي جات ما شي فالمستوى واللاعب براسو ما متعاونش باش يمشي من أولمبيك مارسليا.
أما موقع foot01 الفرنسي، فكشف أن إدارة أولمبيك مارسيليا باغيين يضغطو على أمين حارث باش يقبل يمشي بحالو، والوسيلة ديالهم هي “كأس إفريقيا المغرب 2025″، ويقنعوه بالرحيل إلى فريق آخر باش يلعب ويرجع لمستواه لعل وعسى يرجع إلى المنتخب المغربي باش يشارك معه فكأس إفريقيا 2025، خصوصا وأنها غاتكون فالمغرب وقدام الجمهور المغربي، ومستحيل يبغي يزگل هذه الفرصة (مع العلم أن الناخب المغربي ما بقاش كايعيط لأمين حارث من كان الكوت ديفوار2023، واخا اللاعب تألق من وراها مع مارسيليا)، وهذا الشي بعدما حرماتو الإصابة من المشاركة مع الأسود فمونديال 2022، وتحرم من أنه يكون مع الگروب اللي حقق الإنجاز التاريخي بالوصول إلى الدومي فينال وكلشي كايتفكر الإصابة ديالو مع مارسليا ضد موناكو فالماتش الأخير قبل السفر للمشاركة فكأس العالم، ووضح نفس المصدر أن مارسليا غايضغطو على حارث والمحيط ديالو حيث اللاعب ما يقدرش يتحمل ما يلعبش الـ6 اشهر اللي جايا.