هند لكلاوي كود كازا ///
واش وزيرة للسياحة والصناعة التقليدية والاقتصادي الاجتماعي والتضامني فاطمة الزهراء عمور عندها بلاصتها فنشاط غبي بحال “ليزامريال”؟ اللا. اولا هاد النشاط ما عندو علاقة ابدا بالقطاع اللي كيتشرف عليه الوزيرة. ما هو سياحة. ما هو صناعة تقليدية. لا هو اقتصاد اجتماعي. لا هو اقتصاد تضامني. حضورها فضيحة. اذن حضرات حقاش مول ديك الشركة اللي كيدير “اليقظة” لعدد من الشركات وفيهم اللي كيتشكى من خدمتها الضعيفة٬ مول هاد الشركة هو برلماني حزب التجمع الوطني للاحرار انور صبري.
يعني جات عندو بصفة حكومية لانو من حزبها. كثر من هاد الشي فاختتام دورة سماها الملتقى وقال ليك كيحتافلو بالابداع والابتكار فمجال الاتصال والتسويق٬ هدرات الوزيرة على كأس العالم 2030. اش من علاقة بنشاط بحال هادا مع الهدرة على ملف اصلا ما عندها بيه علاقة. كأس العالم عندو لجنة مكلفة بيه. لجنة عينها رئيس الدولة. التنقاز لاش.
هاد انور صبري عندو مشكلة مع الصحافة. خدمتو كيف قلنا يدير اليقظة “الڤاي” لعدد من الشركات والمؤسسات عمومية او خاصة وحتى الحكومة٬ لكن باش يخرج شي مقال فشي جريدة الكترونية او مكتوبة على شي مؤسسة تخدم معاه كيسكانيه ويرسلو. فهاد الفيلم هو رابح لفلوس علي ظهر الصحافة. وهاد الاخيرة خاسرة. عدد من المؤسسات هدداتو باش ما يبقاش ياخد منها.
هادا هو اللي مشات عندو وزيرة السياحة. المكان الخطأ للحديث عن موضوع ماشي سوقها بشكل مباشر. اللجنة ديال مونديال 2030 هي اللي تقدر تطلب منها تهدر او تسكت. اما ايلى كانت وزارة السياحة كليان عند هاد “امبريال” فراها فضيحة كبيرة بزاف بزاف.
من حق هاد لملايري يدير انشطة يزيد يراكم فالثروة ولكن من الغباء السياسي لوزيرة معاه فالحزب تحضر لهاد النشاط