سهام البارودي- كود//
من بين الانتقادات لي سمعت مؤخرا على الكورال ديال الفنانين لي بانو مع ريدوان فديك التخرميزة ديال كأس ايفريقيا هي كيفاش بنادم سنانو مخززين و طالع بيهم فالتلفزة بوجهو هوكاك احمر ؟
لي بزاف ديال المغاربة ماكايرضوش ليه البال، هي انه السنان و العناية بالاسنان مسألة ثقافية عندنا اكثر ما هي مادية، إيه الدونتيست غالي و بنادم عندو أولويات و كاين لي مالقا تاماياكل بقا ليه غا الدونتيست و لكن خليني من الدونتيست، و خليني من العامل المادي، بغينا و لا كرهنا العناية بصحة الفم و الاسنان هي مسألة ثقافية، راه الشيتة و المعجون ماغالينش ، و هاكاك بزاف ديال الناس و خصوصا الرجال من جميع الفئات الاجتماعية ماكايتسوقوش لسنانهم، يقدر مايحكهمش هوا گاع بالشيتة، تقلبو تلقا ضراسو مازال عامرين ببولفاف ديال العيد الكبير ديال الفين و جوج و هانية ! يتخززو ليه و هانية و يطيحو ليه و هانية، عايش تاهوا معانا يأكل الطعام و يمشي في الأسواق و يهضر معاك و يضحك معاك و يكركر معاك فحالا ماخاصو حتى خير، و مجوج عندو مرتو و كايبوسها تاهوا و كايتموعش معاها و كايولدو الولاد… بلا سنان ! بلا شيتة ! بلا دونتيفريس !
بزاف ديال الرجال مازال عايشين بديك المقولة ديال الراجل كايبقى راجل ! زعما فمو نقي راجل فمو خانز راجل عندو السنان راجل ماعندوش السنان راجل، و هادشي كيما قلت راه فجميع الشرائح الاجتماعية، العناية بالفم و الاسنان كاتبان بلي ماشي أولوية و يا وليك تقوليها ليه ! و شحال من مرا عايشة مع راجلها و عايفاه و ماقاداش تقولها ليه و فاش كاتجي شي كاميرا تصور شي روبورطاج فالمغرب تقدر تعرفو راه المغرب غا بوجوه الناس و السنان الطايحين لدرجة انه قليل بزاف فاش كاتلقى شي واحد عندو شي تستيفة ديال السنان نقية و طبيعية و كايكون غالبا لاعبة فيها الجينات دور كبير و العناية دور اكبر.
الاسنان من غير البعد الجمالي لي فيهم، عندهم دور صحي حيت كانطحنو بيهم الماكلة قبل ماتهبط للمعدة و كايحافظو على الفورمة ديال الوجه ماكايوليش يبان قد الكمشة.
فاش كنت صغيرة كانو كايجيو عندنا للمدرسة يديرو لينا التوعية على العناية بالفم و الاسنان و لكن كانظن انه الجيل الجديد واع بهاد المسألة، الحملات خاصها تكون فالقهاوي و السواق و السناكات و الادارات و قدام البيبان د الجوامع و الخطب د الجمعة باش من هنا مايجي كاس العالم نشوفو مغاربة جداد بسنانهم نقيين كايصوروهم الكاميرات العالمية ماشي بنادم ماعندوش الضراس كي التمساح و لا عندو غي ناب كي ساروت الحبس و حال فمو كايغوت تاهوا فبين سبور حيت المغرب زگل بيت.