مصطفى الشاذلي كود ـ كازا//
الفلوس ما كاتمشيش بوحدها، خاصها شي حد باش يحركها، عندها هدف ومسار للهروب. فهاد العالم ديال التحويلات المالية الخطيرة، فين كاتدوز أدوات بنكية بملايير الأورو بلا ما يديها فيها حد، بان اسم واحد الشركة غامضة سميتها مجموعة أبورلاند، اللي كاتبان من برا بحال شي شركة استثمارية عادية فـ أربيل، العراق، ولكن فالكواليس كانت كاتدير عمليات مالية معقدة بزاف وكبيرة بزاف على شي شركة ما عندهاش تاريخ فالمشاريع الضخمة.
فـ 2018، هاد الشركة دخلات فعمليات مالية قيمتها 6 ملايير أورو، اللي فيها خطوط اعتماد احتياطية (SBLC) وكمبيالات مضمونة ببنوك كبار بحال HSBC، Barclays، وDeutsche Bank. المشكل هو أن هاد الشركة ما عندها حتى مشروع كبير يبرر هاد الفلوس كاملة، لا عقود حكومية، لا استثمارات ضخمة، ومع ذلك، فظرف شهور قليلة، لقات راسها وسط ضمانات مالية كاتساوي ملايير.
ولكن المفاجأة الكبيرة هي أن هاد الأدوات المالية ما تشراوش، بل تكرّاو فواحد العملية مالية اللي دازت عبر نظام SWIFT MT760، اللي كايستعمل لنقل الضمانات البنكية، وبشروط اللي تقريبا مستحيلة فالعالم ديال البنوك: عقود كاتجدد كل عام وبلا فوائد. هاد النوع ديال العمليات ما كايتدارش إلا مع كبار اللاعبين، وإلا راها كاينة شي لعبة أخرى خفية.
منين بداو كايقلبو فهاد العمليات، بان ماثيو سالوسترو، ولكن ما كانش مجرد موظف فشي بنك عادي، بل بان فعدة شركات فـ إيطاليا، وبريطانيا، وبلدان أخرى، ولكن بلا ما يكون عندها شي نشاط حقيقي. فـ2017، دخل يخدم فـUKGB Limited، الشركة اللي كانت داخلة فهاد التحويلات المشبوهة، وبقى معاهم حتى 2018، منين سالات العمليات المالية المرتبطة بأبورلاند. سالوسترو حتى هو كان عندو شركة وهمية فإيطاليا SEA FOOD PRODUCTION SRL، اللي على الورق كانت كاتبيع الماكلة، ولكن فالحقيقة ما كاين لا تجارة لا عمال لا والو، وتسدات بسرعة بلا ما تخلي حتى أثر.
هادشي ما وقفش هنا. فـ 2018، كان مسجل فـ قضية حجز عقاري فإيطاليا، فين كان كاري دار بواحد الثمن اللي قليل بزاف (200 أورو فالشهر)، والمالك ديالها كان شركة وهمية بلا تاريخ مالي. كيفاش واحد اللي كايدوز مليارات فـ الأبناك خاصو يكري دار بهاذ الثمن الرمزي؟ هادشي كايبين أن حتى العقار كايتستعمل فالتلاعبات المالية.
واحد الشخصية أخرى ظهرت فهاد القصة هو كوشا عايديفاندي، اللي كيبان بواحد الشكل غامض بزاف، مرة ساكن فـ دبي، مرة فإسبانيا، ومرة فالسويـد، وعندو جواز سفر بريطاني، ولكن الوثائق ديال بريطانيا كاتقول أنه من سيشل. فـ2020، سجل شركة فـ سيشل سميتها Bin Zayed Petroleum for Investment Ltd، ولكنها ما كانتش كاتدير حتى نشاط واضح.
بعد عامين، فـ2022، الشركة تبدل مالكها وبانت فالسجلات باسم إدوارد إنفيا، واحد الألماني اللي ما عندوش حتى سجل معروف فـ الإنترنت، بحال سالوسترو، وبعد مدة قصيرة، فتحو حساب بنكي فبنك HSBC فـ ألمانيا، ولكن الغريب هو أن الحساب ما كانش فاسم الشركة، بل باسمClyde & Co Deutschland LLP، اللي هو نفس اسم واحد من أكبر مكاتب المحاماة فـ أوروبا، ولكن بلا حتى علاقة رسمية بيناتهم.
فـ يناير 2025، قبل أيام من الإعلان على صفقة استثمار مع نادي الرجاء البيضاوي بقيمة 15 مليون دولار على 3 سنين، قامت Bin Zayed Petroleum for Investment Ltd بمسح جميع المعلومات اللي كاتربطها بماثيو سالوسترو وإدوارد إنفيا من الموقع ديالها. واللي زاد الغرابة هو أن الإعلان ما جاش من الشركة، بل من عند واحد المرشح لرئاسة الرجاء، وكأن هاد الصفقة كانت كاتحاول تبان بحال شي استثمار قانوني، بينما كيبان أنها طريقة جديدة محتملة باش يتم تحويل الفلوس بلا ما يتطرحو أسئلة كثيرة.
النمط ديال هاد العمليات المالية واضح: كايتأسسو شركات فبلدان اللي ما عندهاش رقابة مالية مشددة بحال سيشل وبريطانيا، كايتسجلو مبالغ ضخمة كرأسمال غير مدفوع باش تجذب الانتباه بلا ما تكون عندهم فلوس حقيقية، كاتتسد الشركات قبل ما يتعمق فيها أي تحقيق مالي، وكايتم استغلال الأبناك العالمية باش يدوزو الفلوس بلا ما يخليو أثر، وفاش كايقرب الإعلان على الصفقات، كايمسحو الأسماء ديال الأشخاص المعنيين.
السؤال اللي كيبقى مطروح هو: شكون سلط هاد الإيراني وصحابو على المغرب والرجا؟.