محمد سقراط-كود///
فاش كيبغي شي واحد ياكل رمضان راه كيتقدى ميريندينا ورايبي وكيتخبى فشي طواليط وياكل، أو فاش كيبغي مايمشيش للحج راه كيمشي بدوك الفلوس لتركيا يصاوب السنان أو كيضربهم غير بولفاف في السواق وغرامة في الكاباريات، فاش كيبغي شي واحد مايصليش راه ميقطعها وصافي، فاش كيبغي مايزكيش كيخلي فلوسو عندو ومريضنا ماعندو باس، اذن علاش فاش كيبغي مايعيدش خاصو الدولة لي تلغي العيد، واش هاد المواطن هاتر معندو عقل معندو قرار فردي، معندو خمامات أي بخليوه يمشي للسوق ويلقى حولي فيه عشرين كيلو بخمسالاف درهم وينوض يتسلف ويبيع حوايجو باش يشريه، والى بغا مايعيدش خاصو الدولة تاخد قرار فردي في بلاصتو.
وبما أن العديد من المغاربة يدعوا لمقاطعة منتوجات بعشوائية منها لي كيستهلكها ومنها لي معمرو شافها، ولأهداف متباينة يعني تقدر تسول دابا أي واحد كان قاطع سيدي علي علاش قاطعها ماغاذي يعطيك حتى جواب، او واش عمرك ريحتي في ستاربتكس باش تدعوا لمقاطعتها؟ اذن علاش هاد روح المقاطعة ولي هي صحية وكنأيدها ماتمتدش حتى للعيد الكبير، انا مثلا مقاطع كبير في الصفوف الامامية للمقاطعة، مقاطع القنوات العمومية والعربية عموما، مقاطع بزاف ديال المشروبات والمنتوجات مقاطع الطحين، مقاطع واحد مول الحانوت حدايا ميطفي الثلاجة في الشتا كيشعلها حتى كتوصل الحرارة خمسة وربعين، واي مغربي راه مقاطع شي حاجة هازلي مقاطع خوه ها لي مقاطع نسيبتو، يعني راه ساهلة عندنا نقاطعوا العيد الكبير.
أنك تسلف وتكلف باش تشري حولي كثر من ثمنو الأصلي بتلاتة دالمرات باش تأدي شعيرة دينية، راه سلوك غير منطقي ورمي بالنفس للتهلكة، لدى في حالة الدولة كالغاتش العيد الكبير علاش المغاربة مايقاطعوش العيد الكبيد، من اجل الحفاظ على القطيع أولا، والحفاظ على قدرتهم الشرائية وعلى صحتهم النفسية، راه شحال من واحد كيولي قاتل مرتو او العكس أيام العيد الكبير غير بسباب الضغط النفسي لي كيسببو الحولي الصردي، كنتمنى المغاربة يكونوا عقلاء ويقاطعوا العيد الكبير لأن في مقاطعته خير وفير للبلاد والعباد، وغير تزهى الوقت نعيدو عاوتاني .