سهام البارودي – كود//
نعملو شويش ديال الگوسيب هاد الصباح !
بالنسبة للطلاق ديال بسمى بوسيل و تامر حسني و هاد الهضرة لي خرجات مؤخرا ! انا و الله الى و ماتسالوني حلوف إلى كنت كانتنبأ بهاد النهاية السعيدة من واحد النهار كانو جابوه يديرو معاه استجواب فموازين و لا شي مهرجان كان جا ليه فالمغرب و كايهضرو معاه على بسمة بوسيل و كاتحس بيه مقروص ! الصحفي قال ” المغنية سلمى بوسيل” و هوا يلقمو تامر حسني قاليه ” سابقا سابقا” زعما اجمع راسك معانا آ خونا مراتي انا ماشي مغنية كااااانت مغنية !
تمّا عرفتها طلات خرية ! و زدت تأكدت انها طلات خرية كبييييييرة نهار خرج فواحد التصريح كايقول ليها ” انا لي ربيتك و أنا عارفك مزيان و كانقوليك شنو دّيري و داكشي لي فيه مصلاحتك” و شي هضرة كايبّين راسو فيها هوا بّاها ديال بسمى بوسيل و هوا لي مگيدها حيت هي صغيورة و ماعارفاش ! تما عاوتاني تأكدت بلي طلات خرية كبيرة!
ولكن عاوتاني ! لي دار راسو فالنخالة كاينقبوه الدجاج، حتى هي كانت مدلولة ! بلدية بزّااااف ! بلدية فمخها و تفكيرها و حوايجها و هضرتها و كلشي ! اصلا باش تتفاهمي مع عقلية واحد فحال تامر حسني باغي يجلس المرا فالدار و يحرمها من خدمتها و هوايتها و فنها خاصك تكوني بلدية !
هادشي علاش القصة ديال سلمى بوسيل خاصها تكون عبرة لگاع البنات لي كايصحابهم راه قضاوها لا تجوجو بشي واحد لاباس عليه و لا مشهور و جلسهم فالدار ، قاليها تخرجي من الخدمة “آ لالة جلسي قابلي دارك وولادك ” و لا ” جلسي و داكشي لي كايعطيوك هوما نعطيه ليك ” هادي كلها هضرة كاتصب فمنحى واحد هوا الراجل باغي يحرم المرا من الاستقلالية ديالها، و لا كانت هبيلة و مدلولة و معگازة غاتمزكها هاد الهضرة بزاف، غير هوا خاصك تعرفي واحد الحاجة انه اولا الراجل لي كايبغي الخير للمرا ماعمرو غايفكر يحرمها من الاستقلالية ديالها و ثانيا و الله يا بنيتي و ماخدمتي على راسك و كان عندك فلوسك و استقلاليتك و بلاناتك و حياتك لا حتارمك بوبي! غاتعيشي تحت السبّاط كي كان الراجل لاباس عليه كي كان حازق، نتي ديما اللور و هوا القدّام. نهار كاتلغي شخصيتك و كاتقرري تلعبي دور ” اميرة في بيت زوجي” خاصك تكوني عارفة انه داك البيت بيت زوجك و الثلاجة ثلاجة زوجك و الطوموبيل ديال زوجك و الفلوس ديال زوجك و الحياة ديال زوجك و نتي براسك اكسيسوار جنسي ديال زوجك فحالا قلتي كوموندا شي ثقبة ناطقة من علي ايكسبريس ! نهار زوجك يخونك غاتلقاي راسك بزز منك كاتصبري و نهار يضرب غاتصبري و نهار ينقص منك غاتصبري و ترضي لراسك حتى تلقاي راسك كاتخلصي من الصحة النفسية ديالك و راحتك و نعاسك و حياتك…
بسمة كاين يصحابها الحياة ساهلة بالسهولية و كانت قابلة تعيش وسط كوبل غير سوي مع انسان غير سوي حيت هي اصلا اصلا غير سوية نفسيا عامرة عقد و تخيلات غالطة على دور المرا فالحياة.
آ نوضي تقراي على راسك و تخدمي على راسك و يكونو عندك بلاناتك فالحياة باش نهار تختاري شي بوراس تكوني معاه، تكوني معاه عن حب و نهار تحرار بيناتكم العيشة خلاتها الميلودية مرات دريس طيريري و الخس” نهار يكتاب ليكم الخبز تفارگو راه العالم مطالگ” بلا ضرر نفسي بلا ستة حمص.