كود سبور//
طلع فريق الجيش الملكي إلى المركز الثاني مؤقتا، بعدما ربح فريق نهضة الزمامرة فتيران احمد شكري، البارح السبت، برسم الدورة 24 من البطولة الاحترافية.
وسالا الماتش بين نهضة الزمامرة والضيف ديالو الجيش الملكي بنتيجة 2 لواحد لمصلحة الفريق العسكري، وماركا الهدفين ديال ليفار كل من أحمد حمودان فالدقيقة 40، ومامادو كامارا فالدقيقة 51، أما هدف نهضة الزمامرة ماركاه لهم وليد الصبار فالدقيقة 84، وكملو الدكاليين الماتش ناقصين بعد طرد لاعبهم أشرف مرزاق فاللحظات الأخيرة.
وبهذه النتيجة خداو الجيش الملكي 3 نقط مهمة، طلعو بها إلى المركز الثاني مؤقتا برصيد 42 نقطة، وخاصهم يتسناو منافسهم على الدوزيام بلاص الوداد الرياضي وشنو غايدير فالماتش ديالو ضد الفتح الرياضي اليوم الاحد، أما نهضة الزمامرة فتراجع الفريق إلى المركز الرابع برصيد 40 نقطة.
وعن نفس الدورة ونفس الوقت، سالا الماتش بين المغرب الفاسي واتحاد طنجة بنتيجة التعادل الإيجابي هدف واحد لكل فريق، فتيران الحسن الثاني بمدينة فاس.
الماتش اللي تلعب غير بحضور جمهور المغرب الفاسي حيث السلطات منعت تنقل جمهور اتحاد طنجة لحضور المباراة، ماركا فيه للماص حميد أحداد فالدقيقة 15، وهيثم البهجة ماركا التعادل لطنجاوة فالدقيقة 50.
وبهذه النتيجة قسمو المغرب الفاسي واتحاد طنجة نتيجة الماتش، وكل فريق منهم خذا نقطة واحدة، وولات عند الماص 38 نقطة والفريق محتل المركز 6، واتحاد طنجة عندهم 30 نقطة ومحتلين المركز 11.