سهام البارودي – كود//
مؤخرا تفرجت فبرنامج “حديث مع الصحافة” لي كايدوز فقناة دوزام على اليوتوب، الضيف كان هوا المؤرخ الاستاذ المؤرخ محمد حبيدة و الموضوع كان حول الكتاب ديالو ” المغرب النباتي” لي كايستعرض فيه العادات الغذائية عند المغاربة عبر الزمن.
و لكن ماشي هدا هوا موضوعنا اليوم، الموضوع هوا واحد الجملة تقدر تبان بسيطة قالها المؤرخ و لكن وسط منها بزاف ديال المعاني، “المرا هي الاخيرة لي كانت كاتاكل فالطبلة، طيب الماكلة و ياكل الراجل هوا الاول و ياكلو الدراري و عاد المرا تاكل الشياطة” هادشي كان جاري بيه العمل و مازال جاري بيه العمل فبعض الاماكن عند بعض الناس تقدر تسمع جملة ” سگيو للرجال هوما الاولين” “سبقو الرجال هوما الاولين” ” هاد الطبسيل راه مازال نقي ماكلاوش الرجال بزاف، زيدو دجاجة و سربيوه للعيالات” هادشي علاش ؟ حيت بنادم جاي من واحد الثقافة كاتعتابر الراجل فوق من المرا، حيت هوا لي خدام و هوا لي كايجيب القوت اليومي فراه هوا لي محتاج ياكل و يشبع و يصحاح و تا لا شاطت عليه شي حاجة، شي فراتت و لا شي عظومة ديك الساعة تگددهم المرا.
و لكن فاتيفلوغات ماعارفينش هادشي، كاتجي للفايسبوك كاتكتب ليك ” انا مابغيت لا نقرا لا نخدم انا بغيت نصايب كيكة لزوجي قرة عيني” ” انا بغيت نكون اميرة في بيت زوجي” ” علاش كاطيحو من ربة البيت ؟” حيت يا الهبيلة يا بنت الهبيلة راه جدّاواتك قبل منك جربو هاد الهيت ديال اميرة في بيت زوجي و ماصورو منّو تا ملوة، لقاو راسهم تراسات في بيت زوجهن، خادمات، محگورات، شوف قمّة الاحتقار، تاكلي نتي اللخرة و تاكلي الشياطة هادشي لاشاطت… واش كاين شي أميرة كاتاكل الشياطة ؟ بلا مانهضرو على العنف من طرف الزوج و عائلة الزوج و الاغتصابات و الفقر و لابغا يطلقها و يلوحها للزنقة يلوحها و لا بغا يتجوج عليها يتجوج… وا راه ماكنتيش محسوبة بنادم يا هاد الحمقة ! راه كنتي محسوبة مع الاثات، مع الكسيبة، مع الزربية و البوطة و المانط… كانو كايقولو ليك “المرا حاشاك”
داكشي علاش المرا خاصها تقرا و تخدم و تكون عندها استقلالية مادية باش نهار تتزوج تتزوج حيت باغا شريك تبني معاه حياتها ماشي “أمير” يعتقها و لا “ظل راجل” يسترها هوا ماعتق و ماستر تا كرو.
احسن فترة كانعيشو فيها حنا العيالات هي دابا، عبر التاريخ و فجميع البلدان، يمكن ليك تقراي و تخدمي و تكون عندك استقلالية مادية و تغمسي من نفس الطبسيل مع الراجل و يكون عندك طبسيلك بوحدك گاع لابغيتي و دارك بوحدك و طوموبيلتك و خدمتك و مستقبلك و هواياتك … وا مسخوطة جدّاها، راه كون تشوفك سمحتي فگاع هاد الحقوق و جالسة كاتعاودي لينا فالفايسبوك نفس المشاكل لي عاشتهم جداك فالقرون الوسطى مع الراجل و عائلة الراجل كون ناضت من القبر شتفات عليك.