كود الرباط //
كاين جدل كبير حول استمرار دعم غاز البوتان، لي كلف الدولة الملايير من الدراهم واخا كيستفدو منو الأثرياء كثر من الفئات الهشة، بحيث كاين رأي باغي يستمر دعم غاز البوتان ورأي آخر ضدو.
ولكن فالأخير الحكومة اختارت تستمر فالدعم فهاد الأزمة ديال الغلاء، مقدراتش تلغي الدعم.
الأسباب منطقية منها اساسا السجل الوطني للسكان مزال مخرجش.
الأحرار ضد المس بالدعم ديال الغاز، الحزب لي كيترأس الحكومة كيقول واخا نكونو مع إصلاح المقاصة ولكن الوضعية صعيبة والشارع كيغلي، تا نكونو واجدين ونرفعو الدعم خصوصا والوضع الاقتصادي كيتسم باللايقين.
كاينا تجربة فجهة الرباط سلا القنيطرة مزال متأخرة، مزال الداخلية معلنتش على السجل الوطني للسكان باستثناء قرار خرج ف الجريدة الرسمية بهاد الخصوص كيقول بأنه غايبداو السجل الوطني للسكان بجهة الرباط نهار 28 اكتوبر.
مصدر من الحكومة قال لـ”گود” بأنه لن يرفع الدعم عن البوطان حتى نتكمن من تفعيل السجل الاجتماعي من اجل الاستهداف الأمثل.
وفي سياق متصل قالت نادية فتاح وزيرة الاقتصاد والمالية باللي ثمن الغاز ما غاديش يتبدل. هذا هو الاهم. ماشي غير الغاز الوزيرة قالت باللي حتى القمح والسكر ما فيهاش شي تغيير.
واوضحت الوزيرة اللي كانت ضيفة فالنشرة الرئيسية على « الاولى » الليلة الاثنين 31 اكتوبر 2022 ان الدولة باش تحافظ على هاد الثمن خصصات فقانون المالية 26 مليار درهم =لصندوق المقاصة=
وردا سؤال واش على الرفع التدريجي للمواد الاولية المدعمة من قبل صندوق المقاصة والانتقال للدعم المباشر للفئات الهشة٬ قالت وزيرة المالية “اليوم منكبين على التغطية الصحية. كاينة اليات جديدة من اجل دعم الفئات الهشة” واكدات ان هاد الاليات محتاجة للخدمة باش توجد برامج اجتماعية وهاد الشي غادي يكون فاللول ديال السنة المقبلة.
ولكن الأسبوع الفايت، قال فوزي لقجع الوزير المكلف بالميزانية، بأنه ومن أجل ضمان فعالية الدعم العمومي، قال ” إنه “ينبغي بعد ذلك الانتقال من هذا الدعم إلى الدعم المباشر عبر التحويلات المالية المباشرة، وهذا ما ينص عليه مشروع قانون مالية سنة 2023”