كود الرباط ///
البارح جات فاطمة الزهراء المنصوري٬ وزيرة إعداد التراب الوطني والتعمير والإسكان وسياسة المدينة للبرلمان. جات دافع على القطاع اللي كتشرف عليه. محمد السادس فافتتاح الدورة الخريفية للبرلمان قبل ايام هدر على الاستثمار. قسم الخطاب بين ازمة الما وبين الاستثمار.
ما يمكنش يكون استثمار فالمغرب بلا عقار. الوزيرة بقات علينا بارقام خاوية. ما صالحة لوالو. الانشاء وصافي. سولها فهاد الجلسة محمد بودريقة عن الاحرار اللي هو مستثمر فالقطاع وكيعرفو.
السؤال فرشها وفرش لكلام الخاوي اللي قالتو. فكازا راه الاستثمار فالعقار متوقف ومجمد بكثرة المتداخلين. هاد الاستثمار ما منتج ما والو. 2 مليون بيضاوي خدام فهاد القطاع بطريقة مباشرة او غير مباشرة متضررين من التخربيق اللي كاين فالقطاع.
طبعا من اهم المتدخلين كاين توفيق بنعلي مدير الوكالة الحضرية. هادا بوحدو كان خاص الداخلية تحيدو مباشرة بعد خطاب الملك فالبرلمان. ايلى بصاح المغرب باغي الاستثمار.
هاد بنعلي موقف كلشي. ايلى كانو المشاريع اللي كتقدم ليه فيها مشاكل كان خاصو يخرج يقولها. كانو طاشرونات شفارة ورشاوية يتابعهم قضائيا ويفرشهم. كانو مشاريع كيديرو لقوالب فخدمتهم خاصو يفضحهم. لكن يبقى كيف دابا ساد عليه بابو ما كيدير والو للقطاع. راه كيتحدى الملك ووزيرو لفتيت اللي سبق رسل مذكرة لجميع ناسو بعد كورونا باش يتحرك الاستثمار ووالو.
اه فكازا كاينة حيتان كبيرة ولكن هادي راه دولة كبر منهم. خاص يجي شي حد يصلح لهاد المنصب. هادا راه موقف قطاع استثماري ماشي مهم بل حيوي لكازا. كيف قلنا ايلى توقف ضرر كلشي فكازا. ايلى تحرك كلشي يتعبو
طبعا وزيرة اعداد التراب الوطني والتعمير وسياسة المدينة ما دارت والو من نهار جات الا داك التخربيق ديال اجيو نعرفو مشاكل القطاع. كضيع فالوقت. خاصها تكون عندها الشجاعة وتقول فشلت وتطلب تمشي تقابل مراكش والحزب.