مصطفى الشاذلي موفد كود الى زنزبار////
وسط المحيط الهادي كاينة جنة سميتها جزيرة زنزبار او “ساحل الزنوج”. خلى كل امبراطورية حكماتها تخلي بصمتها. هاد الشي كيبان ف”ستون تاون” وهي لمدينة لقديمة ديالهم. شاهدة على الحاضر والماضي. شاهدة على المرحلة البرتغالية والبريطانية والعمانية والفرس والشعوب الافريقية صحاب التراب. هاد الجزيرة اللي تعرفو عليها لمغاربة هادي سيمانا بعد ما رجعات نهضة بركان بكاس الكونفدرالية للاندية الافريقية بعد تعادل فالاياب ضد سيمبا التنزاني، كيسكنها جوجت المليون نسمة ومساحتها 2500 كلمتر مربع.
الثورة اليسارية اللي داروها السكان الاصليين بحكم العمانيين ف1964 ما قدراتش تجيب لهاد الجزيرة الزوينة بزاف التطور المنشود. مازال السكان الاصليون كيعيشو الفقر واللي حاكمين كيملكو كلشي.
اللي كيشد الانتباه فهاد الجزيرة هو العدد لكبير لمدارس التعليم الديني. طفلات محجبات كيف ما كانت درجة الحرارة. حتى فالشواطئ كاين هاد الظاهرة. كاين انتشار كبير لمدارس تعلم القرآن “غالبية السكان كيقرا فهاد المدارس اللي منتاشرة فالجزيرة. عندنا هاد المدارس هي باش كيبداو الاطفال فبلادنا. بحال الروض. بعدها كيدخلو المدارس ديال الدولة” يقول ل”كود” احد سكان ستون تاون. فهاد الروض كيفرضو صحاب هاد المدارس اللي محسوبين على الاسلام السياسي الحجاب حتى على الطفلات. 
دابا حتى رئيسة لبلاد اي تنزانيا محجبة. اسمها سامية حسن صولوحو وهي اول امرأة وصلات لهاد المنصب فهاد البلد للي دار اتحاد مع جزيرة زنزبار.
فوسط المدينة القديمة “ستوك تاون” تلقى الحجاب حاضر ولكن متعايش مع بنات عاديات. فريسطو “كيب تاون فيش ماركت” ب”فوروداني” اللي حدا الميناء كاين امبوينس خرى. حفلات موسيقية كل ليلة. الطاسة والماكلة والشطيح. حداه كاين بارات كيبقاو حتى وقت متاخر، فيه بنات الجزيرة وشبابها مقصرين شارين. هنا كاين تحرر كبير لا علاقة له باللي كاين فالشارع. مع هاد الجزيرة سياحية كاين الطاسة فكاع لبلايص. الدعارة كاينة فهاد لبلايص. ممتهنات الجنس عندهم الرواج. كاين فميناء رار السلام حتى لافتة فيها باللي النقاب ممنوع. 
فهاد ستوك تاون كاين عدد من الديور ديال الملك. باش كتقرب ليهم، كاينة كاميرات بزاف. فوحدة منهم غير تجبد التلفون يجي عندك صحاب الامن الخاص اللي من زنزبار. كلشي الديور اللي كيقولو صحاب زنزبار باللي ديال المغرب، كيصلحو فيهم. “كود” لقات شاب مغربي ب”تالكي ولكي” مريح على كرسي. هذا كيحرس مدخل وحدة من الديور. قليل فكلامو. ما كيجاوب على حتى استفسار واخا يكون على امور اخرى ما عندها علاقة بالاقامات. 
الجيران ديال هاد المنازل اللي جات وسط المدينة القديمة، فرحانين بالجار بحال اللي خدامين فقهوة اسمها “افريكانو”. كيقولو باللي التعامل ديال الناس اللي كيحضيو المنازل زوين بزاف. ما قدرناش نعرفو شحال من بيت عند سيدنا، للي كاين هو عندو اكثر من جوج فبلايص قريبة. كاين اقامة ملكية فالجزيرة وكاين عدد من لمغاربة كلفين بيها وعلى رأسهم محافظ
هنا كاين جوجت الانواع ديال البيوت. بيوت لهنود فيها نقوش وتماتيل خشبية فاللخاريج. عندها بالكون برا كذلك. كاين بيوت العرب “العمانيون”، دايرة بحال رياضات فاس القديمة. الشراجم اللي كيطلو على الزنقة صغار وعندهم باثيو الداخل. البيبان عادية.
فواحد من هاد البيوت ديال لهنود وقريب من ديور سيدنا، تزاد ف5 شتنبر 1946 فاروخ بولسارا. غادي يتحول هاد الطفل لاسطورة من اساطير هاد الزمن. انه فريدي ميركوري الفنان المغني الشهير لمجموعة “ذو كوين”. البيت اللي تزاد فيه ولى متحف وحداه اوطيل بنفس الاسم “فريدي ميركوري”. كاين اقبال عليه. داير بحال شي مزار للتخشع. تصاور ميركوري او فاوخ. عقد الازياد ديالو. هاد المتحف عليه اقبال.
للي بغى دوك الشواطئ التيركواز برمالها الذهبية خاصو يقطع الجزيرة من الجنوب للشمال. يقصد نونكوي. حتى شواطئ كينينگوا فالشرق الجزيرة والشواطئ اللي قريبة منو زوينة.
التنقل فيها خاصك تكري طونوبيلة بشيفورها، كتمتع بزاف فلخضورية للي مغطية كلشي. ايلى بغيتي تنقل من المدينة لقديمة للمدينة الجديدة تقدر تتنقل ب”توك توك” والنقل الجماعي. اما ايلي بغيتي تمشي لدار السلام فاحسن تاخد الباطو. انت وجيبك كاين الدرجة الاولى والبينزس والعادية. شي ساعة و40 دقيقة تكون فالعاصمة. كاينة المطار اللي قريب من لمدينة لقديمة.
سكانها ظريفين. فماتش بركان ضد سيمبا، واخا هو نادي العاصمة دار السلام وسكان الجزيرة عزيز عليهم “ذو يانگ”، كلشي دخل للتيران باحترام. عندهم روح رياضية كبيرة. خسرو خرجو بهدوء لا تهراس. بلا ضرب. بلا مشاكل. وشدو الطريق وباش تلاقاو مشجعين من بركان كيسلمو عليهم. سكان الجزيرة ديما مستعد يقدم المساعدة للسائح. كيديرها بابتسامة. كيعرضو عليك المساعدة. حتى فالبيع والشرا ايلى ما عندكش “شلن”، عملتهم المحلية، تقضي الغرض بالدولار
جزيرة تستحق تشاف. ايلى جاك الملل عندك ميزانية ديال 600 دولار وها انت وسط تانزانيا كدير سافاري فاحسن دولة افريقية فهاد الدومين.
