مصطفى الشاذلي كود ////
مازال تداعيات ماتش الوداد وإشبيليا ماسالاتش حيث اللي وقع فالماتش ماشي غير “أخطاء تنظيمية”، راه فضيحة بكل المقاييس، شي حاجة كتحشم وكْتعري على واحد المستوى ديال التسيب ما عمر جمهور الوداد يستاهلو. مقابلة كاتخص ناد كبير، ولكن التنظيم كان بحال شي عرس دايرينو هرگاوة، وكلشي باغي يدير فيها المسؤول وشي خدمة ما كينة.
فمجموعات الواتساب ديال المنخرطين، الغوات والغليان واصل للسما. شي منخرطين صدمونا بشهادات ديالهم: جوج ديال الناس ماشي من الجمهور المعروف، دخلو للملعب VVIP بلا تيكيي، مع العلم أن التذاكر اللي قيمتها 2000 درهم للوحدة كاملة كانت يا إما تباعت يا إما توزعات بالمجان. السكيريتي دارت خدمتها ومنعتهم، ولكن المفاجأة جات من فوق، من عند آيت منا اللي تاصل وقال ليهم دخلوهم. والسؤال هنا: فين غاديين يجلسو؟ فحجر المنخرطين؟ فوق الكراسي اللي عندهم ماليهم؟ ولا على فوق الناس؟
“گود” سبق وهضر على الناس اللي جلسو فالأرض ومنهم الناطق الرسمي للفريق، حتى جابو ليهم كراسي ديال الأعراس، بحال إلى كانو فشي دوّار، ماشي فماتش ديال ناد عريق بحال الحمرا.
وماشي غير هكاك، حتى فالبوفّي ديال ما بين الشوطين ولات فوضى، كلاشات، تزاحم، الناس كتدوز بلا ما شي حد يراقب، حتى اضطرات السكريتي تحل الباب على عينيه وتخلي اللي بغا يدخل يدخل، حيت عدد الناس اللي دخلو بلا تيكيي وهرگاوة اللي وزع عليهم الوزاني التذاكر خرج على كلشي.
لكن الكوميديا السوداء فمجموعات واتساب المنخرطين جاو بها من بعد، ملي بان فالفايسبوك تصويرة ديال مول محلبة كيورّي دعوات توصل بيها، وقال بكل وقاحة: “كان ممكن نبيعهم ونشري طوموبيل، ولكن بغيت نجي نزاحم …. هاداك”، يقصد آيت منا. شي منخرطين ضحكو من القهر، واحد قال: “هدا هو جزاء العشوائية والبلادة”.
الوزاني اللي مكلف بالتنظيم، زاد الطين بلة. كيتصرف بحال شي تريتور مبتدأ، ماشي فمكتب ناد كبير. المنخرطين اللي كيدفعو ألفين درهم أو أكثر على كل ماتش، كيتفرجو فناس ما عندهم علاقة لا بالنادي لا بالجمهور، كيدخلو فابور واكلين شاربين، والنادي كيضيع الفلوس ديالو على والو.
دابا كاين اللي كيحاول يبرد الأعصاب وكيقول: “صبرو، الرئيس غادي يدير اجتماع قبل المونديال ونهضرو فهادشي”، ولكن بصراحة، حتى لّي ما كيهدّرش فهمها: العشوائية ولات هي النظام، والفوضى ولات عادية، واللي داير فيها رئيس كيتعامل مع الوداد بحال إلى ورثها، كيدير فيها اللي بغا ومخلي الكراكيز اللي ضارين بيه كيتعامو مع الوداد بمنطق الغنيمة.
الوداد فريق ديال التاريخ، ماشي ديال المحلبات و مالين النضارات والخرجات العشوائية والمواعيد الغرامية. واللي ما قادرش يكون فالمستوى، يشد الصف اللور، حيت جمهور بحال جمهور الوداد يستاهل ما حسن، بزاف. ايت منة وعد وما وفى بوالو. خاصو يتحاسب قبل ما يحط السوارت. يتحاسب معاه المكتب اللي باغي يسكتو برحلة لميريكان وباغي يحسبها انجاز ديالو وهي راها دعوة من الفيفا ماشي من ايت منة