محمد سقراط-كود///
كم جميل المغرب بلا العيد الكبير، مكاين لا صوت الحوالا من فوق السطوحة، مكاين لا ريحة الفرث في الدروج ديال العمارة، مكاين براكات ديال التبن والفاخر مجموعين فيهم الزطايلية دالحومة، مكاين لا شوايات ومجامر كيتباعوا فين مامشيتي، مكاينش قصص ديال انتحار آباء حيت مقدروش يشريو الحولي، مكاين لا حالات طلاق بسباب قرون الحولي مكبارش لدرجة يعوضوا صغر حاجات خرى، مكاينش عنف أسري بين الأزواج او في حق الأبناء بسباب الستريس ديال العيد، مكاينش فيديوات ديال حوالا قرروا يهربوا من المذبحة الجماعية لي كتسناهم، مكاينش فيديوات لعيالات كيبكيو حيت شراو الحولي ومات ليهم نهار قبل العيد.
مكاينش النصابة لي كل عام كيجمعوا الفلوس من اجل شراء أضاحي العيد للفقراء والمعوزين، مكاين لا مغاربة كيبكيو في مواقع تواصل الاجتماعي وكيطلبوا من المحسنين يشريو ليهم حولي باش يفرحوا الدراري الصغار، الصراحة هادي عمري فهمتها كيفاش هاد الأطفال كيفرحوا بمشهد الذبح والدم والزبل والخماج، والوالدين كاعيين وعيانين والام كتوصل العشية كتلقاها عيانة مدگدگة وكتنوض تسلخ الدراري، مكاينش نهار عيدكم نهار جوعكم، نخرج تقلب غير على خبزة متلقاها، مكاين مقاتلة على الگرابة حيت الپيسريات غادي يشدو، والشحمة كثيرة كتبغي الشراب باش تهضم.
كنظن خاص العيد الكبير يتلغى إلى الأبد أو على الأقل يتم تبني صيغة أكثر تمدنا ولطفا منه، مثلا حاليا بزاف ديال الأسر عوض يذبحو حولي للواحد قرروا يتشاركوا في حولي واحد، هادي فكرة جد مزيانة حبذا لو تكون كل عام، او ناس مشاو شراو اللحم والدوارة وغادي يشويو في الدار بلا هاراج وماراج وقوة الدمايات والزبل وتضياع لما، وعوض داك المذبحة ديال سبعة دالمليون واس تذبح كل عام يتقلص الرقم لجوج او مليون ونص، اه يقدر يكون هادشي فيه ضرر اقتصادي ولكن راه غير الشناقة لي غادي يضيعو الفلاح ديما بايع بالرخى، وكاع مكيستافد بزاف من داك الثمن المرتفع باش كيتباع العيد، وهاديك فلوس كتدور ممخلصين عليها ضريبة ممستافدة الدولة منها بوالو اللهم بلاش.