كود سبور//
مركزين المسؤولين ديال كرة القدم المغربية، على مواجهة المنتخب الوطني المغربي للمنتخبات الإفريقية، باش يكون واجد لكاس إفريقيا “المغرب2025”.
وكشفت مصادر جورنال “گود”، أن الجامعة الملكية المغربية لكرة القدم برئاسة فوزي لقجع والناخب الوطني وليد الركراكي ديارين فالماتشات الوديين ديال ليكيب ناسيونال استعدادا لكأس إفريقيا، يلعبو ضد المنتخبات الإفريقية، وماشي يلعبو ضد منتخبات من خارج القارة السمرا بحال المنتخبات الأوروبية اللي عادة غايلعبو ضدها ماتشات أميكو قبل كأس العالم وماشي قبل كأس اإفريقيا.
ووضحت نفس المصادر، أنه وعكس المنتخبات الأخرى اللي كايلعبو ماتشات وديين ضد منتخبات أوروبية، فالمنتخب الوطني المغربي خاص يكون عندو احتكاك بمنتخبات إفريقية، باش اللاعبين يزيدو ياخدو التجربة ضد منتخبات إفريقية غايلعبو مع بحالها فكأس إفريقيا، اللي هي المسابقة المقبلة، وماشي يلعبو ضد منتخبات ما لاعبينش الكان.
المصادر وضحت أنه ومن بعد مواجهة تونس والبنين الفماتشات الوديين بجوج اللي دازو، غايلعب المنتخب الوطني المغربي ضد منتخبات إفريقيا أخرى من هنا حتى تبدا كاس إفريقيا، وغاتكون ضد منتخبات صغيرة ومتوسطة وحتى ضد منتخب كبير، وبنسبة كبيرة غايكون منتخب السنغال، باش الأسود يكونو واجدين لكوب دافريك.