مع الوقت غايولي العيد الكبير نقيقي فحال نويل، غير نويل كايديرو فيه لاداند فالفران وحنا فالنسخة المغربية غانحتافلو بشي كتف فالفران ولا قتيبات مشويين، كعب غزال والطرب الاندلسي، قفيطنات جداد والكادويات للعائلة نعام آسيدي، بلا ستريس بلا دم بلا ريحة مازير! وديك الساعة تقدر گاع تصدّر هاد العيد ويحتافلو بيه الناس من العالم ماشي نتا عندك العيد عامر بالدم و البطاين و كاتسول ” علاش ماكايحتافلوش معانا؟” تا فيناهوا الاحتفال ؟

سهام البارودي – كود//

كل عام كانشوف الاحتفالات ديال نويل فأوروبا و ميريكان، كانسول راسي علاش ماعندناش شي احتفال فحال نويل، نقي و خفيف و مناسبة كاتجمع فيها العائلة باش تصل الرحم و شي يعطي الكادويات لشي فواحد الجو هادئ و نقي، الموسيقى، الماكلة المزيانة و النشاط في جو دافئ عائلي. علاش عندنا غا العيد الصغير لي كايكون فيه بنادم مهلوك مورا شهر ديال الصيام ؟ و العيد الكبير لي عامر دم و تبن و ريحة مازير ؟ علاش ماعندناش عيد كانتبادلو فيه الكادويات ؟ عمك يجيب ليك بلاي ستايشن و خالتك تشري ليك التوني لوريجينال ديال الريال ؟ و نتا تشري ريحة كادو لختك و تبادلو الكادويات و تبروفيتيو من العطلة ديال العيد باش ترتاحو و ديرو شي انشطة مجموعين عوض يدوز العيد في جو ممل.

ولكن هاد العام كانظن انه المغاربة دارو خطوة نحو خلق “نويل” النسخة المغربية، غير هوا نويل ديالهم كايديرو فيه لاداند فالفران و نويل ديالنا غانديرو فيه شي كتف فالفران و لا قتيبات مشويين، هاحنا غاديين فالطريق باش نخلقو ڤيرسيون جديدة ديال العيد الكبير، نقية، خفيفة، مافيهاش داك الستريس ديال العيد و حولي بمليون و نص و الگزار بستالاف ريال و التگراض بعشرالاف و سير جري شري شواية جديدة و مجمر جديد و القتبان جداد و الطاسات د ميكة و السطولة و آرا القنبة، مد ليا الجنوية، مضّي المّاس المزيان، شدوه، علقوه، نفخوه، آ لطيف يا لطيف واش عيد هذا و لا معتقل ابو غريب ؟

الشراشر ديال الدم و البطاين و الذبّان و ريحة مازير و التبن و الوسخ و الكويرات ديال الخرا د الحولي فالديور و السطوحة و الزناقي و العمارات و التشواط ديال الراس فالزنقة و التشابولات و العنف و الجرائم و العنف … ماشي عيد هذا لي كايدوز وسط هاد الاجواء ! ماشي احتفال هذا لي كايدوز بهاد الطريقة.

العيد هوا هاد النسخة لي سايرين يطورو فيها المغاربة، العائلة مرتاحة و مجموعة فالدار على شي كتف محمّر و شايضات و ماكلة نقية، بنادم لابس حوايج جداد، و علاش لا تولي الثقافة ديال الكادويات فحال نويل ، الاب مرتاح حيت ماخاسرش مليون و نص فالحولي و شانق راسو فالكريدي و الام مرتاحة حيت مادوزاتش الصباح ديالها كاتسيق الدم فالسطح و الخواتات ضاربين قفيطنات نقيين ماشي دوك البيجامات المخططين باش يقلبو المصارن فالروبيني ! عيد ديال 2025، بعيدا على داك الستريس و الاجواء البربرية.

و ديك الساعة غايولي العيد الكبير مناسبة ممكن ليك تصدرها للعام، فحال نويل، فحال ديڤالي ديال الهندوس، مناسبة قابلة للتصدير و يقدر يحتافل معاك بيها العالم الكامل، أما نتا عندك عيد عامر بالدم و ريحة التقلية و كاتسول بوجهك احمر ” علاش كانحتافلو معاهم بنويل واش هوما كايحتافلو معانا ؟” باش بغيتيهم يحتافلو معاك ؟ تا فيناهوا الاحتفال اصلا يا بوراس ؟

إقرأ الخبر من مصدره